Túrkistan oblysynyń 4 turǵyny velosıpedpen Mekkege ýmra saparyna attandy

TÚRKІSTAN. QazAqparat - Keles aýdanyna qarasty Aqqorǵan eldi mekeninde turatyn bir top azamat kishi qajylyq paryzyn óteý úshin velosıpedpen jolǵa shyqty, dep habarlaıdy QazAqparat tilshisi.

Qarapaıym «Ýral» velosıpedine mingen olar búgin Qazyǵurt aýdanynyń mańyna turaqtaǵan.

Al, tańerteń «Túrkistan-Samara» baǵyty arqyly saparyn jalǵastyrady.

Keıin Aqtaý qalasyna baryp, Kaspıı teńizi arqyly Túrkııaǵa ótedi. Jalpy jolaýshylar bir aıda Mekke qalasyna kirýdi josparlap otyr.

«Aýyldan 4 adam bolyp jolǵa shyqtyq. Ulym Islamnyń jasy 29-da. Al, týystarym Ulan 50-de bolsa, Muzaffar 47 jasta. Ózim 61-ge aıaq bastym. Jolǵa qajetti karta, kompas sekildi zattarymyzdy aldyq. Al, asymyzdy joldan iship jatyrmyz. Keı jerlerde satyp alsaq, keı jerlerde halyq ózderi tamaqtandyryp júr» - deıdi Jabbaráli Tashmetov.

Aqsaqal bul saıahatqa biraz ýaqyttan beri daıyndalypty.

Alys sapar bolǵandyqtan velosıped minip, aýyl arasynda shynyqqan.

Tipti arasy 30 shaqyrym bolatyn Keles pen Saryaǵash aýdanyna shaıtan arbamen baryp kelgen kezderi kóp.

«Óńirimizde velosıpedpen tuńǵysh ret qajylyqqa biz shyǵyp otyrmyz. Qandaı qıyndyq bolsa da shydaýǵa daıynbyz. Alla qajylyǵymyzdy qabyl alsyn dep nıet etemin», - deıdi ol.