Túrkistan oblysynyń 177 aýylynda elektrondy qujat aınalymy engiziledi

TÚRKІSTAN. QazAqparat - Bıyl Túrkistan oblysynda túrli salalardy tsıfrlandyrý maqsatynda 29 jobany júzege asyrý josparlanyp otyr. Ótken jyly oblys kóleminde tsıfrlandyrý salasy boıynsha 17 joba iske qosylǵan bolatyn. Bul týraly Óńirlik kommýnıkatsııalar qyzmetinde ótken brıfıngte oblystyq tsıfrlandyrý, memlekettik qyzmetter kórsetý jáne arhıvter basqarmasynyń basshysy Elnur Ótebaev málimdedi, dep habarlaıdy QazAqparat.

Sonymen qatar, aǵymdaǵy jyldyń sońyna deıin 177 aýyldyq okrýgte elektrondyq qujat aınalym júıesi engizilmek. Buǵan qosymsha qarajat talap etilmeıdi.

«Oblysta mektepte oqıtyn oqýshylardyń qaýipsizdigin qamtamasyz etý úshin «Qazaqtelekom» AQ arqyly Túrkistan jáne Arys qalalarynyń 11 mektebinde beınekameralar ornatylyp, «qaýipsiz-mektep» pılottyq jobasy júzege asyrylyp jatyr. Arys qalasynda 6 mektepke 135 beınekamera, Túrkistan qalasynda 6 mektepke 162-si ornatyldy. Budan basqa, Túrkistan qalasyndaǵy №13 Naýaı atyndaǵy mektepke demeýshi esebinen bir IT-synyp jáne bir STEM-panel qoıyldy. Túrkistan qalasyndaǵy №27 mektepte týrnıket ornatylyp, oqýshylarǵa arnaıy ıdentıfıkatsııalyq kartochkalar taratyldy. Sondaı-aq, «E-kitaphana» júıesi pılottyq joba engizilýde», - dedi Elnur Ótebaev.

Basqarmanyń uıymdastyrýymen bıyl Túrkistan jáne Kentaý qalalarynyń 3-D modelderi qurylady jáne aerofotosemka jumystary tolyq aıaqtalmaq. Budan bólek, qosymsha salyq túsimderin arttyrý maqsatynda, tsıfrlandyrý qurylǵylarynyń kómegimen arnaıy algorıtm daıyndalǵan.

«Bizdiń esebimiz boıynsha oblys bıýdjetine qosymsha 2 mlrd teńgeden astam salyq túsirýge múmkindik bar jáne bul oblystyń salyq bazasyn toltyrýǵa múmkindik beredi. Sonymen qatar, Shardara, Maqtaaral jáne Jetisaı aýdandarynda aýylsharýashylyq maqsatyndaǵy jerlerge kosmo-monıtorıng jumystary da júrgizildi», - dedi basqarma basshysy.

Búgingi tańda oblysta 838 eldi meken bar. Onyń ishinde 101 eldi mekende uıaly baılanys múldem joq. Atalǵan másele boıynsha oblystyq Tsıfrlandyrý, memlekettik qyzmetter kórsetý jáne arhıvter basqarmasy salalyq Tsıfrlyq damý mınıstrligimen tıisti jumystar júrgizip, «Bılaın» baılanys operatory jyl sońyna deıin 82 eldi mekenge uıaly baılanys arnasyn engizbek.

Ótken jyly basqarmamen qosymsha 33 jańa memlekettik qyzmetter avtomattandyrylǵan. Nátıjesinde oblystaǵy memlekettik kórsetiletin qyzmetterdiń 91,2%-y elektrondy júıege enip otyr.

Túrkistan oblysynyń Óńirlik kommýnıkatsııalar qyzmeti