Túrkistan oblysynyń 1688 turǵynyna 2 mlrd teńge qaıtarymsyz grant retinde úlestiriledi

ASTANA. QazAqparat – Túrkistan oblysynda «10 myń adamǵa 100 jańa jumys ornyn ashý» bastamasy aıasynda 12 myńǵa jýyq jumys orny paıda bolǵan, dep habarlaıdy QazAqparat tilshisi.

Bul jaıynda oblysbasshysy Darhan Satybaldy ortalyq kommýnıkatsııalar qyzmetinde ótken brıfıngide málim etti.

«Memleket basshysynyń «10 myń adamǵa 100 jańa jumys ornyn ashý» bastamasy aıasynda Túrkistan oblysynda 12 myńǵa jýyq jumys orny ashyldy. Bıyl óz ishin ashýǵa nıetti 1688 adamǵa qaıtarymsyz grant usyný kózdelýde. Bul baǵytqa 2 mlrd teńge bólingen. Sondaı-aq alǵash ret 594 jasqa 2,5 paıyzben jeńildetilgen shaǵyn nesıe beriledi. Túrkistandyq jastar úshin 2,9 mlrd teńge qarastyryldy», - dedi ol.

Ákimniń aıtýynsha, jumyspen qamtý jáne kásipkerlikpen aınalysýǵa baǵyttalǵan memlekettik baǵdarlamalardy keńirek nasıhattaý sharalary turaqty júrgizilip keledi.

«Ásirese, aýyl jastaryn, NEET sanatyndaǵy azamattardy osy múmkindikterdi qalt jibermeýge shaqyryp otyrmyz. Óıtkeni, keıbir azamattar beıhabar bolýy múmkin. Sondyqtan aqparattyq-túsindirý toptarymyz jumysty kúsheıtpese, báseńdetpeıdi. Osyndaı júıelengen josparymyzdyń nátıjesinde jumyssyzdyq deńgeıi 5% boldy», – dedi Darhan Satybaldy.