Túrkistan oblysynyń 16 úılestirý ortalyǵy SOVID-19 ınfektsııasymen kúresýge daıyn
TÚRKІSTAN. QazAqparat - Túrkistan oblysynyń barlyq aýdan-qalalarynda koronavırýs ınfektsııasymen kúres baǵytynda jumys júrgizetin úılestirý ortalyqtary quryldy. Quramyna jergilikti atqarýshy organ ókilderi men aýdandyq aýrýhanalardyń dárigerleri kiredi, dep habarlaıdy QazAqparat tilshisi.
Oblystyq ákimdiktiń málimetinshe, úılestirý ortalyqtarynyń qyzmeti ahýaldy ortalyqpen baqylanady. Barlyq aqparat 24/7 formatynda biryńǵaı ortalyqtandyrylǵan aqparattyq bazaǵa engiziledi.
Sondaı-aq, óńirde úılestirý ortalyqtary ashylyp, indettiń taralýynyń aldyn-alý maqsatynda jasaqtalǵan mobıldi toptardyń sany da arta túsken. Qazirgi tańda oblys kóleminde 120-ǵa jýyq monıtorıngtik top qyzmet atqarýda. Mobıldi toptardan kelip túsetin aqparatty qabyldaý jáne óńdeý úshin aýdan, qalalardaǵy 16 úılestirý ortalyǵy oblys ákimdiginiń ahýaldyq-taldaý ortalyǵyna joldaıdy.
Sońǵy málimetterge súıensek, mamandar shilde aıynan beri 42 233 nysandy aralap, karantındik rejım talaptary buzylǵan 5 282 jaǵdaıdy anyqtaǵan.
Karantın talaptaryn buzǵan tulǵalarǵa qatysy QR Ákimshilik quqyq buzýshylyq týraly Kodeksiniń 425-babynyń 1-tarmaǵy boıynsha 4 710 hattama toltyrylǵan. Aıyppuldyń jalpy somasy 244 700 130 teńgeni quraǵan.
Sońǵy aptada 191 hattama toltyrylyp, onyń ishinde 185 jeke tulǵaǵa 30 aılyq esep kórsetkishi, 4 jeke kásipkerge jáne 2 laýazymdy tulǵaǵa 230 aılyq esep kórsetkishi kóleminde aıyppul salynǵan.
