Túrkistan oblysyndaǵy jylyjaılardy damytý isine túrik kásipkerleri atsalysady
ASTANA. QazAqparat - Túrkistan oblysyndaǵy jylyjaılardy damytý isine túrik kásipkerleri atsalysady. Bul týraly Túrkistan oblysynyń ákimi Janseıit Túımebaevtiń túrik kásipkeri Djemalettın Shekermen kezdesýinde belgili boldy, dep habarlaıdy oblystyq ákimdiktiń baspasóz qyzmeti.
Túrkııalyq Dal Holding Investment CO. kompanııasy jetekshisiniń Qazaqstandaǵy orynbasary jáne bas keńesshisi D.Shekermen júzdesýde oblys aımaǵynda, onyń ishinde, Túrkistan men Kentaý qalalarynda quramdastyrylǵan jylyjaı keshenin salý jobasy sóz bolyp, ony júzege asyrý jaıy aıtyldy. 200 gektardan astam jerde jylyjaı sharýashylyǵyn damytyp, onda ósirilgen ónimniń 80 paıyzyn eksportqa shyǵarýdy josparlap qoıǵan ınvestorlar qalǵan kókónisterdi ishki naryqta saýdalaýdy oılap otyr.
Sheteldik kompanııanyń elimizdegi ókiliniń tanystyrylymyn muqııat tyńdaǵan aımaq basshysy oblystaǵy jaýapty sala basshylaryna tıisti qoldaýlardy kórsetýdi tapsyrdy. Ásirese, Janseıit Qanseıituly jylyjaı keshenin salýshylardyń kógildir otyn, elektr qýaty syndy qajettilikteriniń tarıfin qymbattatpaı, ońtaıly sheship berýdi júktedi.
Túrkııalyq Dal Holding Investment CO. kompanııasy negizin 1985 jyly Ystambulda qalaǵan. Dúnıe júzi boıynsha 2 myńnan astam qyzmetkeri bar aldyńǵy qatarly ınjenerlik jáne ónerkásiptik topqa jatatyn seriktestik joǵary taýar aınalymymen jáne úlesimen erekshelenedi. Kompanııa joǵary tehnologııalyq ónerkásiptik qondyrǵylardy jobalaý, óndirý jáne montajdaý syndy jumystarmen aınalysady. Sonymen birge, ónerkásipke qajetti kez kelgen qurylǵyny ornatyp beredi. Holdıng jumysyn bastaǵan 33 jyl ishinde tsement, taý-ken óndirý, elektromotor salasy, avtomatızatsııa, mashına jasaý jáne energetıka salalarynda aıtarlyqtaı jetistikterge jetken.
Aıta ketý kerek, Túrkistan oblysynda búgingi tańda 1250 gektardan astam jylyjaılar bar. Onyń 50 paıyzynan kóbi Saryaǵash aýdanynda ornalasqan.
