Túrkistan oblysyndaǵy jedel shtab 36 myńǵa tarta azamatty tekserdi
TÚRKІSTAN. QazAqparat – Túrkistan oblysyndaǵy Polıtsııa departamentindegi jeke quramnyń qyzmeti erekshe jaǵdaıǵa kóshirilip, toqtaýsyz jumys júrgizilýde. Óńirde asa mańyzdy memlekettik, strategııalyq, rejimdik ári erekshe qorǵalatyn jáne halyqtyń tynys-tirshiligin, kólik qyzmetiniń jumys isteýin qamtamasyz etetin nysandar tolyq kúzetilýde, dep habarlaıdy QazAqparat tilshisi.
Elimizde koronavırýsqa qatysty tótenshe jaǵdaı engizilýine baılanysty Túrkistan oblysy ákiminiń janynan jedel shtab qurylǵan. Aımaqta ózge qalalardan kelgen azamattardy, kólikterdi tekserip ótkizý maqsatynda Túlkibas aýdanynda «Shaqpaq» jáne Kentaý qalasy aýmaǵyna «Saýran» shep beketteri qoıylǵan. Sondaı-aq, azamattardy esepke alý jumystary júrgizilýde. Búginniń ózinde bul beketterden 13 296 avtokólik pen 35 976 azamat tekserilip ótkizilgen.
Budan bólek, oblys aýmaǵynda barlyq eldi mekenderde toı-tomalaq ótkizgen jaǵdaıda qatań jaýapkershilikke tartylatyn eskertildi. Tótenshe jaǵdaı engizilýine baılanysty, zań talaptaryn saqtamaǵan tulǵalarǵa qatysty, QR ÁQBtK-niń 476-babymen 54 ákimshilik quqyqbuzýshylyq týraly hattama toltyrylǵan.
Sondaı-aq, jyl basynan koronovırýsqa qatysty polıtsııa departamenti QR Qylmystyq kodeksiniń 274-babymen (Kórineý jalǵan aqparat taratý) 7 qylmystyq is qozǵaǵan. Barlyq qylmystyq is boıynsha tergep-tekserý amaly júrgizilip jatyr.
Jalpy Túrkistan oblysynyń aýmaǵynda iri saýda ortalyqtary men bazarlar, avtovokzaldar men mega ortalyǵy, onyń ishinde 1 kınoteatr men kafe-bar ornalasqany belgili. Tótenshe jaǵdaıǵa baılanysty iri saýda ortalyqtarynyń qyzmet kórsetý ýaqyty saǵat 10.00-den 18.00-ge, bazarlar 11:00-den 17:00-ge deıin shektelgen. «Mega» saýda oıyn-saýyq ortalyǵyndaǵy kınoteatr jumysy karantınge baılanysty toqtatylsa, 1 133 kafe-bardy saǵat 22.00-den keıin jabý jumystary júrgizilýde.
