Túrkistan oblysyndaǵy jańa aýdanda Arbat salynýda

KELES. QazAqparat – Túrkistan oblysynda jańadan qurylǵan Keles aýdany ortalyǵynda Arbat ashylady. Demalys orny Jastar jylyna oraı jastardyń bos ýaqytyn tıimdi ári qyzyqty ótkizý jáne januıalyq demalysqa jaǵdaı jasaý maqsatynda salynbaq, dep habarlaıdy QazAqparat tilshisi.

Aýdan ákimi Aqmentaı Esbaev aýdan ortalyǵy Abaı aýylynda ashylatyn arbattyń zamanaýı úlgide jáne kórikti demalys aımaǵy bolatynyn aıtady. «Aýyl – el besigi» baǵdarlamasy aıasynda júrip jatqan jol qurylysynyń barysymen tanysqan ákim, sondaı-aq aldaǵy ýaqytta jastar úshin arnaıy velojolaq pen skeıtbord alańshary qurylatynyn jetkizdi. Bul maqsatta arnaıy jer telimi qaralyp, qurylys ornynyń jobasy jasalýda.

Aqmentaı Esbaev budan bólek, aýdan ortalyǵyndaǵy jol qurylysy júrip jatqan kóshelerdi aralap, merdigerlerdiń jumysyna qatysty syn aıtty. Kóshe boıyna sýaǵar ornatý jumystarynyń mardymsyzdyǵy nátıjesinde qurylǵylary sapasyz qoıylyp, kórkin buzǵan. Aýdan basshysy merdigerlik kompanııa ókiline qatań eskertý berip, ony qaıta jasaýdy talap etti.

Aıta keteıik, Abaı aýylynyń 27,7 shaqyrymdy quraıtyn 23 ishki kóshesin ortasha jóndeýge 1134,5 mln teńge qarjy bólingen. Aýdannyń 43,9 shaqyrymdyq 30 ishki kóshesin ortasha jóndeýge 2020 jylǵa 745,7 mln teńge qarjy bólý josparlanyp otyr.