Túrkistan oblysyndaǵy jańa ashylǵan aýdanda 5 mektep salynyp jatyr
TÚRKІSTAN. QazAqparat - Túrkistan oblysynyń ákimi Janseıit Túımebaev jumys saparymen Keles aýdanyna bardy.
Oblys ákimi áýeli Dostyq eldi mekenindegi «Nurly jer» baǵdarlamasy boıynsha atqarylyp jatqan jumystarmen tanysty. Onda qazirgi tańda turǵyn úı qurylysy úshin 69 gektar aýmaq qaralyp, ınfraqurylym júıesi qarastyrylýda. Keıin óńir basshysy Júzimdik aýyldyq okrýginde ornalasqan Keles ózenindegi Oımaýyt sý bógetine turaqtap, ondaǵy nysannyń jaǵdaıyna qanyq boldy.
Oblys ákimi bastaǵan sapar Jýantóbe eldi mekenindegi «TM-Stroı-21» JShS-nyń press jip ıirý jáne qysh zaýyttarynyń jumystarymen tanysýmen jalǵasty. Jobanyń jalpy quny - 250 mln teńge, óndiris orny jylyna 1 000 tonna press jibin daıyndaıdy. Al jobalyq quny 160 mln teńgeni quraıtyn qysh zaýyty jylyna 32,4 mln kirpish shyǵarady. Bıyl qurylysy bastalǵan óndiris orny 2020 jyly tolyq iske qosylady.
Keles aýdanyna resmı sapar aıasynda aımaq basshysy Oshaqty aýyldyq okrýgindegi 600 oryndyq №105 Qońyrtóbe jalpy orta mektebiniń ashylý saltanatyna qatysty. Aıtýly sharada sóz alǵan oblys ákimi jergilikti jurtty jańa nysannyń ashylýymen quttyqtady.
«Elbasymyz «Kez - kelgen el óziniń keleshegin óskeleń urpaǵymen baılanystyrady» dep atap ótkendeı, memleketimiz bala tárbıesi men onyń bilim alýyna úlken mán berip, jan-jaqty jaǵdaı jasaýda. Máselen, bıyl oblys boıynsha respýblıkalyq jáne oblystyq bıýdjet esebinen 18,4 mlrd teńgege 90 mekteptiń qurylysy júrgizilýde. Onyń ishinde Saryaǵash aýdanynda 19 mekteptiń qurylysy bastaldy. Jyl qorytyndysymen oblys boıynsha 45 bilim ordasy paıdalanýǵa beriletin bolady. Onyń ishinde 15 mektep «Nurly jol» memlekettik baǵdarlamasy aıasynda salynýda. Onyń 5-i Keles aýdanynyń úlesinde. Jańa oqý jylynyń qarsańynda 600 oryndyq mekteptiń jańa ǵımaraty paıdalanýǵa berilgeli otyr. Osy bilim uıasynan elge qyzmet eter azamattar tárbıelenip shyǵa bersin», - dedi Janseıit Qanseıituly. 
Sapar sońynda oblys ákimi Qoshqarata aýyldyq okrýgindegi «Qaınar» JShS-nyń tyń jobasymen tanysty. Jobanyń negizgi baǵyty - qymyz óndirý jáne at sportyn damytý. Búginde seriktestik jalpy sany 50 bıeden kúnine 150-200 lıtr qymyz óndirip otyr. 
