Túrkistan oblysyndaǵy Jambyl aýylyna gaz keldi
Saltanatty sharaǵa arnaıy qatysqan aýdan ákimi Baqytbek Tanagózov jambyldyq turǵyndardyń qýanyshymen bólisti.
«Táýelsizdik týyn tikken jyldardan beri elimizde, onyń ishinde bizdiń aýdanda kóptegen aýqymdy jumystar qolǵa alynyp, el ıgiligine berilip jatyr. Sonyń bir parasy búgin Jambyl aýylynda júzege asty. Aýylǵa kógildir otyn berilip jatyr. Bul - Táýelsizdik tartýy», - dedi ol.
Kógildir otynǵa qol jetkizgen Jambyl aýylynyń turǵyndary endi kómir tasyp, kúl shyǵarmaıtyn boldy dep, júrekjardy tilegin jetkizgen aýdannyń qurmetti azamaty, eńbek ardageri Ábdihalyq Aǵabekov el turǵyndary atynan alǵysy men rızashylyǵyn bildirdi.
Jambyl aýyly buǵan deıin gazdandyrylmaǵan bolatyn. Endi eldi meken turǵyndaryn kógildir otynmen qamtamasyz etýge qatysty týyndaǵan máseleler tolyǵymen sheshimin taýyp otyr. 
Aıta keterlik jaıt, aýdanda 2015 jyly «Beıneý-Shymkent» magıstraldy gaz qubyrynyń qurylysy júrgizilip, qarasha aıynda kógildir otynnyń alaýy jaǵylyp, aýdan ortalyǵyna gaz berilgen bolatyn. Oblys qazynasynan arnaıy qarjy bólinip, 2017-2018 jyldar aralyǵynda aýdandaǵy 8 eldi mekenge gaz qubyry tartyldy. 8 eldi mekenniń 3-eýi - Jambyl aýyldyq okrýgine qarasty aýyldar. Qazirgi tańda gaz okrýg ortalyǵyna berilse, qalǵan 2 eldi mekende jaqyn kúnde kezek-kezeńimen qosylǵaly otyr.
Sonymen qatar, qazirgi tańda aýdandaǵy 7 eldi mekende gaz qubyrynyń qurylysy júrip jatyr.
