Túrkistan oblysyndaǵy tasqyn sý Saryaǵash aýdanynda da bir aýylǵa jaıylǵan
TÚRKІSTAN. QazAqparat - Túrkistan oblysynda tasqyn sý Saryaǵash aýdanynyń Baǵys aýylyn da shaıyp ketken. Bul týraly óńirdiń TJD málimet taratty, dep habarlaıdy QazAqparat tilshisi.
Kúni keshe qatty jaýyn saldarynan Qazyǵurt aýdanynyń 4 eldi mekenin sý shaıyp ketken bolatyn. Topan sý Saryaǵash aýdanynyń Baǵys aýylynda 53 úıdiń aýlasyna, 18 úıdiń, 1 toıhananyń, 16 sharýashylyq qurylystyń ishine sý kirgeni anyqtalyp otyr. Sý basqan aýmaqtardan 50 adam evakýatsııalanyp, barlyǵy týystarynyń úılerine taraldy. Sondaı-aq úı janýarlary qyrylǵan, sany anyqtalýda. Qazir bul aýmaqtarda jergilikti atqarýshy jáne tótenshe jaǵdaı bóliminiń qyzmetkerleri tarapynan aýmaqtan sý soryp shyǵarý jumystary júrgizilýde.
«Aýdandyq órt sóndirý bólimi men beketteriniń, jergilikti aýyl ákimdikterdiń uıymdastyrýymen sý sorǵyshtar kósheler men úıdiń aýlalaryna tolǵan sýdy shyǵarý jumystarymen aınalysýda. Jumysqa TJ Tótenshe jaǵdaılar departamentiniń 56 qyzmetkeri, 9 birlik tehnıka, 11 motopompa jáne jergilikti atqarýshy organdardyń 19 qyzmetker, 6 birlik tehnıka, 2 motopompa kúshterimen sýdy sorý jáne aryqtardy tazalaý jumystary júrgizilýde. Sonymen qatar kóshelerdi, úılerdiń aýlalaryn sý basý faktisine baılanysty aýdan ákimdiginiń jedel jelisi iske qosylyp, turǵyndar tarapynan habarlamalar túsken jaǵdaıda shuǵyl is-sharalar atqarylýda» delingen oblystyq TJD baspasóz qyzmeti taratqan habarlamada.
