Túrkistan oblysyndaǵy sý tasqyny kezinde 50 adam qaýipsiz jerge kóshirildi
TÚRKІSTAN. QazAqparat – Túrkistan oblysy Qazyǵurt aýdanynyń 4 eldi mekeninde jáne Saryaǵash aýdanynyń 1 aýylynda jaýyn-shashyn saldarynan oryn alǵan jaǵdaıdy qalpyna keltirý boıynsha shuǵyl áreket jasalýda. Sý basqan aýmaqtardan 50 adam evakýatsııalanyp, olar týystarynyń úılerin ýaqytsha panalaýda, dep habarlaıdy QazAqparat tilshisi.
Oblystyq TJD bastyǵynyń orynbasary Erik Sarybaevtyń sózinshe, tolassyz jaýǵan jaýyn áserinen 70-ten asa úıdiń aýlasyna sý kirip, 1 meıramhana men 16 ǵımarat sý astynda qaldy. Sýǵa ketken úı janýarlarynyń sany anyqtalýda.
«Qutqarý jumystaryna oblystyq tótenshe jaǵdaılar departamentiniń 56 jáne jergilikti atqarýshy organdardyń 19 qyzmetkeri jumyldyryldy. Olar 15 birlik tehnıka, 11 motopompa kúshterimen sýdy sorý jáne aryqtardy tazalaý jumystaryn júrgizýde. Budan bólek, kóshelerdi, úılerdiń aýlalaryn sý basý faktisine baılanysty aýdan ákimdiginiń jedel jelisi iske qosylyp, turǵyndar tarapynan habarlamalar túsken jaǵdaıda shuǵyl is-sharalar atqarylýda», - dedi Erik Temirhanuly.
Al, «Qazgıdromettiń» boljamy boıynsha búgin túnde óńirdegi taýly aımaqtarda nóser jaýyn kútiledi. Sonymen qatar, oblystyń soltústigi men batysynda, kúndiz taýly aýdandarda naızaǵaı, burshaq, daýyl bolýy yqtımal. Soltústik-batystan shyǵysqa aýysatyn jel soǵyp, naızaǵaı kezinde ekpini 15-20 m/s deıin údeı túspek.
