Túrkistan oblysyndaǵy sý tasqyny: 4 eldi mekende sý burý jumystary júrip jatyr

ASTANA. QazAqparat – QR Tótenshe jaǵdaılar mınıstrligi Túrkistan oblysyndaǵy sý tasqyny men onyń saldarymen kúres baǵytynda qabyldanyp jatqan sharalar týraly málimetterdi jarııalady, dep habarlaıdy QazAqparat mınıstrliktiń baspasóz qyzmeti taratqan derekterge silteme jasap.

Baspasóz qyzmetiniń málimetterine qaraǵanda, qazirgi ýaqytta 4 eldi mekende, atap aıtqanda Báıdibek aýdanynda Shaıan men Shaqpaq, Saýran aýdanynda Shaǵa jáne Arys qalasynda sý burý jumystary júrgizilýde.

QR TJM jáne jergilikti atqarýshy organdardyń kúshterimen úılerdi sý basý jaǵdaıynyń aldyn alý úshin 12 000 qum salynǵan qap tóseý jumystary júrgizildi.

Qarnaq aýylynda Kentaý qalasy, Báıdibek, Ordabasy, Saýran aýdandarynda barlyǵy 21 kóshe men 235 aýla aýmaǵyn, sondaı-aq Ordabasy aýdanynda mekteptiń aýmaǵyn sý basqan.

Jumys júrgizýge TJM, jergilikti atqarýshy organdardyń, Qorǵanys mınıstrliginiń kúshteri men quraldarynan 400-den astam adam, 70-ke jýyq tehnıka, 35 motopompa jumyldyryldy.

TJD kúshimen Kentaý qalasyndaǵy Qarnaq aýylynyń, Saýran, Báıdibek aýdandarynyń sý basqan aýla aýmaǵynan 204 adam jáne 201 usaq mal evakýatsııalandy. Halyqty evakýatsııalaý jáne ýaqytsha ornalastyrý úshin jergilikti atqarýshy organdar Saýran aýdanynda 4 evakýatsııalaý pýnktin daıyndady.

Respýblıkalyq jáne oblystyq jedel shtab jumys isteıdi.

Jedel jeli telefondary jumys isteıdi: Astanada - 87172533284; Túrkistan oblysynda - 87253357881.

Oblystyq mańyzy bar 11 avtomobıl jolynyń 23 ýchaskesinde jol tósemin sý shaıdy. Sý tasqynyna baılanysty oblystyq mańyzy bar «Kóksaıat-Aqsý-Saıan-Myńbulaq-M-32», 118-136 km 117-179 avtojoly jabyldy.

Sý tasqynynyń saldarymen kúresý úshin Túrkistan oblysyna Shymkent qalasynyń TJD kúshteri men quraldary jiberildi.

«Qazgıdromet» RMK derekteri boıynsha 3 aqpanda oblystyń basym bóliginde jaýyn jýyp (jańbyr, qar), aýa temperatýrasy kóterilip, qar tez erıdi, erigen jáne eńis aǵynynyń qalyptasýy, muz qubylystarynyń álsireýi jáne ózenderdegi sý deńgeıiniń kóterilýi múmkin.

Búgin, 2 aqpan kúni saǵat 08:00-den bastap taýly aýdandarda qar erip, jaýyn-shashynnyń kóp túsýine baılanysty sý deńgeıi kóterilgenin jazdyq. Saldarynan Kentaý jáne Túrkistan qalalarynda jáne Báıdibek, Ordabasy jáne Saýran aýdandarynda aýlalar men kósheler sý astynda qaldy.

Sondaı-aq tasqyn sý Saýran aýdanyndaǵy eldi mekenderge qaýip tóndirip turǵany habarlandy.

Túrkistan oblysynyń úsh aýdanynda 6 kósheni sý basqany aıtyldy.

Óńirde kóligimen tasqyn sý ortasynda qalyp qoıǵan turǵyndar qutqaryldy.

Saýran aýdanynda 7 balabaqsha jumysyn toqtatty.

Túrkistan oblysynyń ákimi tasqyn sý kirgen eldi meken turǵyndarymen kezdesti.

Kentaý qalasy men Saýran aýdanynda tótenshe jaǵdaı jarııalanýy múmkin ekenin jazdyq.