Túrkistan oblysyndaǵy sel: 522 úıdiń aýlasyn sý shaıyp, 258 adam evakýatsııalanǵan
TÚRKІSTAN. QazAqparat – Túrkistan oblysyndaǵy Tólebı, Qazyǵurt, Báıdibek aýdandarynda jalpy sany 522 úıdiń aýlasyn sý shaıyp, 258 adam evakýatsııalanǵan. Bul týraly oblys ákiminiń orynbasary Sáken Qalqamanov óńirlik kommýnıkatsııa qyzmetiniń alańynda málimdedi, dep habarlaıdy QazAqparat tilshisi.
Oblys ákimi orynbasarynyń aıtýynsha, apat bolǵan aýdanda taýly aýdandarda nóser jaýynnyń saldarynan sel tasqyny oryn alǵan. Saldarynan 4 úıdi sý basyp, turǵyn úılerden 1077 m3 sý shyǵarylǵan.
«Tólebı aýdanyndaǵy Qasqasý ózeninde sý deńgeıiniń kóterilýinen 4 úı, 376 aýla aýmaǵyn sý basty. Jergilikti mańyzy bar tórt kópirdi sý shaıyp ketti. 8 bas iri qara jáne usaq mal shyǵyny boldy. Aýdan ortalyǵy Lengir qalasyndaǵy 20 aýla sý astynda qaldy. №5 kásibı tehnıkalyq kolledj bazasynda zardap shekken Sultanrabat aýylynyń 150 turǵynyna evakýatsııalyq pýnkt uıymdastyryldy. Ol jerge 70 adam jaıǵastyryldy. Onyń 32-si balalar. Taǵy 80 adam jaqyn mańdaǵy týystarynyń úıine ornalasty. Qosymsha Kóksáıek eldi mekeninde ornalasqan №9 kópsalaly kolledjinde 150 adamǵa arnalǵan evakýatsııalyq pýnkt daıyndaldy»,- dedi Sáken Qalqamanov.
Oblystyq TJD málimetinshe, Qazyǵurt aýdanynda 6 úıdiń aýlasy men Qarjan aýylyndaǵy «Sembı» emhanasynyń aýmaǵyn sý basqan. S. Rahymov aýyldyq okrýginiń turyndaryn evakýatsııalaýǵa tótenshe jaǵdaı qyzmetkerleri jumyldyrylyp, Kókibel aýylynan 133 adam evakýatsııalanǵan. Aýyl turǵyndary týystarynyń úılerine jaıǵastyrylǵan. Qazirgi tańda sý basqan aımaqtardaǵy aryqtardy tazalaý jumystardy júrgizilýde.
«Báıdibek aýdanyndaǵy Aqbastaý aýyldyq okrýgine qarasty Turaqty kanalynan tasyǵan sý 3 eldi mekendegi 13 úıdiń aýlasyn basyp qaldy. Sý deńgeıi 20 sm-ge deıin kóterilgen. Tótenshe jadaı qyzmetkerleriniń kómegimen Turaqty aýylynan 55 adam Aqbastaý aýylyndaǵy Sh.Ýálıhanov orta mektebindegi evakýatsııalyq pýnktke ornalastyryldy. Onyń ishinde 18-i jas balalar. Oblystyq TJD janynan jergilikti atqarýshy organdar men polıtsııa qyzmetkerlerinen quralǵan jedel shtab quryldy. Sý tasqyny zardabyn joıýǵa 612 maman men 84 tehnıka 47 motopompa tartyldy»,- dedi Sáken Qalqamanov.
