Túrkistan oblysyndaǵy reıdte júrgizýshilerdiń myńǵa jýyq tártip buzýshylyǵy anyqtalǵan
TÚRKІSTAN. QazAqparat - Túrkistan oblysynda polıtseıler «Avtobýs» jedel-profılaktıkalyq is-sharasynyń qorytyndysyn shyǵardy. Toǵyz kúndik reıd kezinde júrgizýshiler tarapynan myńǵa jýyq tártip buzýshylyq anyqtalǵan, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, atalǵan shara jol qaýipsizdiginiń aldyn alý men jol qozǵalysy erejesin saqtaý maqsatynda uıymdastyrylǵan.
«Reıd kezinde mas kúıinde avtokólik aıdaǵan 3 jaıt anyqtalyp, 259 júrgizýshiniń rýlde uıaly telefonmen sóıleskeni tirkeldi. 81 júrgizýshi jyldamdyqty arttyryp, 88 kólik tizgindeýshi manevr erejesin buzǵan. 6 kólik boıynsha qarama-qarsy jolǵa shyǵyp ketý oqıǵasy tirkelip, aıyppul turaǵyna 20 avtokólik qoıyldy. 48 júrgizýshi jolaýshylar men júk tasý erejesin buzǵan. Eńbek tártibi men demalysyn buzǵany úshin 10, mindetti tehnıkalyq baqylaýdan ótpegen 103 júrgizýshi jazalandy. 4 júrgizýshige zańsyz jolaýshy tasyǵany úshin hattama toltyryldy» delingen habarlamada.
Polıtseıler júrgizilgen osyndaı jedeldetilgen profılaktıkalyq is-sharany ótkizý jol-kólik oqıǵasynyń sanyn azaıtatynyna senimdi.
