Túrkistan oblysyndaǵy memqyzmetshilerdiń jalaqysy 2,5 esege ósti
TÚRKІSTAN. QazAqparat - Túrkistan oblysynda memlekettik qyzmetkershilerge jalaqy faktorlyq-baldyq shkala boıynsha tólenedi. Bul týraly búgin óńirlik kommýnıkatsııalar qyzmetinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Ǵalym Tursynbaev osylaı málim etti, dep habarlaıdy QazAqparat tilshisi.
Ǵalym Tursynbaevtyń aıtýynsha, atalǵan júıe memlekettik qyzmetshilerdiń isterine úlken jaýapkershilikpen qarap, sapaly jumys isteýine jeteleıdi. Buǵan qosa, jyl sońynda jumys nátıjesiniń tıimdiligine sáıkes qosymsha bonýstar berilmek. Bul rette qyzmetkerlerdiń jaýapkershiligi, derbestigi, tájirıbesi, arnaıy bilimi, júktemesi sekildi faktorlar eskerilip, jalaqy taǵaıyndalady.
«Buǵan deıin ortalyq jáne aýdan deńgeıindegi memlekettik qyzmetshilerdiń, sondaı-aq, memlekettik jáne jeke sektorlarda qyzmetshige eńbekaqy tóleýde teńsizdik boldy. Eńbekaqy tóleýdiń jańa júıesi anyqtalǵan máselelerdi joıady. Bul júıe faktorly-baldyq shkala negizindegi turaqty bólik pen bonýstardan turady. Mundaı júıeler AQSh, Sıngapýr, Jańa Zelandııa syndy ozyq elderde jáne de BUU, Dúnıejúzilik pen Azııalyq damý bankterinde qoldanylady. Qazaqstanda osy ádisteme birqatar jeke jáne kvazımemlekettik sektorlar engizilgen», - dedi Ǵalym Sultanuly.
Jańa júıeniń engizilýi óńirler men ortalyq qyzmetkerleriniń eńbekaqylarynyń sáıkessizdigin azaıtýdy kózdeıdi. Osylaısha jalaqy aıyrmashylyǵy 70 paıyzdan 10 paıyzǵa deıin kemigen. Bul aýmaqtardan kadrlardyń jappaı ketýin azaıtyp, jergilikti memlekettik apparattyń turaqtylyǵyn qamtamasyz etip, kadrlyq belsendilikti kúsheıtip otyr. Sonymen qatar, agenttiktiń Túrkistan oblysy boıynsha departamenti qyzmetshileriniń jalaqysy da 2,5 esege deıin ulǵaıdy. Nátıjesinde departamentte ótken konkýrsta jetekshi mamanǵa jarııalanǵan bir orynǵa 39 adam qujat tapsyrǵan. Jalpy, eńbekaqy tóleýdiń jańa júıesiniń engizilýi birinshi kezekte memlekettik organdardyń ishki rezervteriniń qurylýyn qamtıdy.
