Túrkistan oblysyndaǵy medıtsına mekemeleri mindetti medsaqtandyrýǵa tolyq daıyn
Túrkistan oblysy ákiminiń orynbasary Joldymurat Amanbaevtyń tóraǵalyq etýimen ótken jıyn barysynda óńirdegi mindetti áleýmettik medıtsınalyq saqtandyrý júıesin engizýge daıyndyq barysy talqylandy. Jańa júıe keler jyldan bastap tolyq kúshine enetin bolady. Jıyn barysynda keı aýdandarda bul másele boıynsha halyq arasynda túsindirme jumysynyń jetkiliksiz ekendigi aıtyldy.
2020 jyldyń 1 qańtarynan bastap ár jumysshy tabysynyń 1% aı saıyn saqtandyrý qoryna aýdaratyn bolady. «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń málimetinshe, jańa júıemen oblys halqynyń 82 % qamtylǵan.
Beıresmı, jaldamaly jumysker, turaqty tabysy joq azamattar áleýmettik saqtandyrý qoryna aı saıyn 2 525 teńge aýdarym jasaýy qajet. Aýdan jáne aýyl turǵyndary úshin jarna mólsheri eki ese az. MÁMS júzege asqannan keıin tegin medıtsınalyq kómek toqtap qalmaıdy, deıdi mamandar.
Jańa júıeniń artyqshylyǵy - konsýltatıvtik-dıagnostıkalyq kómek, sonyń ishinde qymbat baǵaly zerthanalyq qyzmet túrlerin, syrqattardy dári-dármekpen qamtamasyz etý, medıtsınalyq ońaltý jáne patsıent densaýlyǵyn qalpyna keltirýge baǵyttalǵan em-dom túrlerin qamtıdy.
Al, balalar men zeınerkerler, UOS ardagerleri, kópbalaly analar, múgedek jandar men sot úkimimen jazasyn óteýshiler úshin medıtsınalyq saqtandyrý qory memleket tarapynan qarjylandyrylady.
