Túrkistan oblysyndaǵy Maıbulaq aýylynda ózen sýy arnasynan asyp ketti
TÓLE BI AÝDANY. QazAqparat – Túrkistan oblysynyń Tóle bı aýdanyndaǵy Maıbulaq aýylynda ózen sýy arnasynan asyp ketti. Nóser jaýynnyń saldarynan kóterilgen «Nur-ata» ózeniniń sýy arnasynan asyp ortalyq kóshedegi kópirdi shaıyp kete jazdaǵan, dep habarlaıdy QazAqparat tilshisi.
Aýdan ákimdiginiń málimetinshe, 5 mamyr kúni saǵat 14:30 shamasynda shamadan tys jaýǵan jańbyr saldarynan aqqan aǵashtar kópirdiń tirekterine keptelisip qalǵan. Jınalǵan sý kópirdiń betine shyǵyp, tasyǵan.
«Osy jaǵdaıǵa oraı aýdan ákimi Baýyrjan Omarbekovtiń bastamasymen qurylǵan jumys toby eldimekenge baryp, ózen sýynyń deńgefin kórip qaıtty. Qaýiptiń aldyn-alý maqsatynda tótenshe jaǵdaılar qyzmeti men aýyl turǵyndary jumyla birlesip, kópirdi jedel tazartty. Sonymen qatar «Nur-ata» ózeniniń boıyn tazalaýǵa arnaıy tehnıkalar jumyldyryldy. Qazirgi tańda eldimekenge tóngen qaýip joq» delingen habarlamada.
