Túrkistan oblysyndaǵy kıeli jerlerdiń alyp maketteri jasalady
Oblystyń 2018 jyldaǵy áleýmettik-ekonomıkalyq damý kórsetkishteriniń qorytyndysyna arnalǵan keńeste oblys ákimi Janseıit Túımebaev qala-aýdan ákimderine aımaqtaǵy kıeli jerlerdiń kartasy ázirlenetinin aıtyp, tıisti tapsyrmalar berdi.
«Elimizde alǵash ret Túrkistan oblysyndaǵy kıeli jerlerdiń úlken kartasyn jasaýdy uıǵaryp otyrmyz. Bul rette, árbir aýdan, qala basshylaryna bıiktigi 3-4 metr bolatyndaı etip, ózderiniń óńirlerindegi tarıhı eskertkishterdiń kóshirme maketin Túrkistan qalasyna syılaýdy tapsyramyn. Máselen, Báıdibektegi «Báıdibek ata», «Domalaq ana», «Shaıan» meshiti, Sozaqtaǵy «Baba túkti Shashty Áziz», «Aqbýra» syndy eskertkishter. Osy syndy tarıhy qundylyqqa tunyp turǵan jádigerlerimizdi oblystyń kartasyna engizýimiz kerek», - dedi Janseıit Túımebaev.
Sondaı-aq oblystyq Ekonomıka basqarmasynyń basshysy Arman Sábıtov aımaqtyń damý kórsetkishteri týraly baıandama jasady. Onyń sózinshe, ekonomıkanyń basty kórsetkishi bolyp tabylatyn jalpy óńirlik ónim kólemi 2018 jyldyń qańtar-qyrkúıeginde 1 trln 103,9 mlrd teńge somasynda qalyptasqan. Óńdeý ónerkásibinde 236,9 mlrd teńgege ónim óndirilip, naqty kólem ındeksi 0,7 paıyzǵa artqan. Aýyl sharýashylyǵynda da ónim kólemi 544,3 mlrd teńgeni qurap, 2017 jylmen salystyrǵanda 5,3 paıyzǵa kóbeıgen.
«Byltyr oblysqa 288,1 mlrd teńge ınvestıtsııa baǵyttaldy. Bul 2017 jylmen salystyrǵanda 1,2 paıyzǵa kóp. Investıtsııa qurylymynda negizgi úlesti jeke qarajattar quraıdy. Al 2017 jylmen salystyrǵanda memlekettik ınvestıtsııa kólemi ótken jyly 91,8 mlrd teńgeni qurap, 5,2 paıyzǵa artty. ıAǵnı, aýdan, qala ákimderi bıýdjettik ınvestıtsııa kólemin arttyrý baǵytynda jumys júrgizýde dep túıindeýge bolady. Qurylys pen turǵyn úı salasynda da oń ózgeris. ıAǵnı, Túrkistan oblysyndaǵy qurylys jumystarynyń kólemi 139,1 mlrd teńgeni qurady. Bul 2017 jyldyń sáıkes kezeńimen salystyrǵanda 1,9% joǵary», - dedi Arman Sábıtov.
Jıynda basqarma basshysy jumyspen qamtý salasynda atqarylǵan jumystar jóninde de baıandady. Ol «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasymen» 69 682 adam qamtylyp, jyldyq jospar 110,1% artyǵymen oryndalǵanyn jetkizdi. Munan bólek, oblysta memlekettik jáne salalyq baǵdarlama sheńberinde 31 001 jańa jumys orny ashylǵan.
Otyrys barysynda qala-aýdan ákimderi men basqarma basshylary da óz salalaryndaǵy kórsetkishterdiń retin baıandady.
Keltirilgen málimetterge tolyqtaı qanyqqan oblys ákimi jaýapty jetekshilerge josparlanǵan kórsetkishterdi mejesine jetkizip oryndaýdy tapsyrdy. Kenjelep qalǵan salalardy damytyp, kóterýdi júktedi.
