Túrkistan oblysyndaǵy keı aýdandarda kómir baǵasy sharyqtap ketti
Jıynda oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary B.Polatbekov óńirdegi 2830 bıýdjettik mekeme jylý maýsymyna tolyq daıyn ekenin jetkizdi. Onyń sózinshe, oblystaǵy 2830 bıýdjettik mekemege qajetti 169 myń tonna kómir otyny jáne 6 mln lıtr suıyq otyn tolyq tasymaldanǵan. Ortalyqtandyrylǵan jylýmen qamtamasyz etetin mekemelerge kómir qajettiligi - 106 myń tonna, tasymaldanǵany - 61 myń tonnany quraǵan.
«Oblystaǵy ortalyqtandyrylǵan jylýmen qamtamasyz etiletin 544 kópqabatty turǵyn úı jylý berýge daıyn. 2018 jyldyń 1 qańtaryndaǵy jaǵdaı boıynsha oblystaǵy eldi mekenderdiń tabıǵı gazben qamtylǵany 343-ke jetip, qamtý deńgeıi 40,8 paıyzdy qurady. Aǵymdaǵy jyly qosymsha 42 eldi mekenge gaz ınfraqurylymyn tartyp, qamtý paıyzyn 45,7-ge jetkizý josparlanyp otyr», - dedi Baqytjan Ánýarbekuly.
Basqosýda oblys ákimi Janseıit Túımebaev aýdandarda áli de gaz qubyryn tartý jumystary kenjelep jatqanyn tilge tıek etti. Sondaı-aq, Shardara syndy aýdandarda kómir baǵasynyń sharyqtap ketkenin aıtyp, baǵany turaqtandyrýdy tapsyrdy. Budan ózge, oblys kóleminde elektr energııasynyń jıi sónetinin synap, 53 myń kVt jaryq berilmegenin jetkizdi. Bul sala boıynsha da aýdan basshylaryna tapsyrma júkteldi. Sonymen qatar, jıynda oblystyq jolaýshylar kóligi jáne avtomobıl joldary basqarmasy basshysynyń mindetin atqarýshy Maqsat Myrzabaev óńirdegi oblystyq mańyzy bar avtomobıl joldaryn qysqy merzimde kútip ustaý jumystaryna qarjy bólinip, jumystar atqarylyp jatqanyn jetkizdi.
«Oblystaǵy avtomobıl joldaryn qysqy merzimde kútip ustaý jumystaryna jumyldyrylatyn tehnıka sany - 134, jumysshylar sany - 279 adam. Tehnıkalar tolyǵymen jumys isteýge daıyn. Inertti materıaldar boıynsha 9 674 tekshe metr qum jáne 636 tonna tuz ázirleý josparlanǵan bolsa, jospar 100 paıyzǵa oryndalyp, aýdan, qalalardaǵy qoımalarǵa tasymaldandy», - dedi Maqsat Myrzabaev.
Jıynda «QazAvtoJol» UK AQ Túrkistan oblysy boıynsha fılıalynyń basshysy M.Dúısembekov búgingi kúnde «QazaqAvtoJol» JShS OQO fılıaly 766,2 shaqyrymǵa qysqy kútim boıynsha daıyndyq jumysyn júrgizip jatqanyn jetkizdi.
Májilisti qorytyndylaǵan oblys ákimi Janseıit Túımebaev óńirdiń qys maýsymyna daıyndyǵyn pysyqtaýda asa muqııat bolý kerektigin aıtty. Sondaı-aq, Túrkistan-Shymkent, Shymkent-Saryaǵash baǵytyndaǵy avtomobıl jolynda jol-kólik oqıǵasynyń jıilep ketkenin baıandap, ol jerlerge arnaıy belgiler ornatýdy, qaýipsizdik sharalaryn uıymdastyrýdy tapsyrdy.
