Túrkistan oblysyndaǵy karantın statsıonarlarynda tósek-oryn sany artty
TÚRKІSTAN. QazAqparat - Túrkistan oblysyndaǵy medıtsınalyq uıymdardyń karantın statsıonarlarynda tósek-oryn sany artyp, 400-ge jýyqtady, dep habarlaıdy QazAqparat oblys ákiminiń baspasóz qyzmetine silteme jasap.
Shet memleketterden kelgen azamattar koronavırýs ınfektsııasyna synama tapsyryp, nátıjesi shyqqanǵa deıin atalmysh ortalyqtarda ýaqytsha oqshaýlanady. Shekaralas aýdandarda baqylaý kúsheıtildi.
Oblystyq qoǵamdyq densaýlyq basqarmasynyń málimetinshe oqshaýlaý ortalyqtary Saryaǵash, Atakent, Kentaý qalalary men Saıram, Qazyǵurt jáne Keles aýdandarynda da ashylǵan. Saryaǵash aýdandyq ortalyq aýrýhanasyna qarasty karantındik statsıonar 180-orynǵa artty.
Sońǵy málimet boıynsha, karantındik statsıonarlarda oblys boıynsha 56 adam dárigerlerdiń baqylaýynda jatyr.
Túrkistan oblystyq qoǵamdyq densaýlyq basqarmasynyń basshysy Marat Pashımov shekaralas aýdanda ornalasqan karantındik statsıonardy aralap, medıtsına qyzmetkerleriniń indettiń taralýyna tosqaýyl qoıý amaldaryn pysyqtady.
Aýdandyq aýrýhana zerthanasynyń táýligine 500-ge jýyq koronavırýs ınfektsııasyna synama alýǵa múmkindigi bar. Taıaý ýaqytta jeke ottegi stantsııasy iske qosylady.
Emdeý mekemesi 2-3 aılyq dári-dármek qory jáne jeke qorǵanys quraldarymen tolyq qamtamasyz etilgen.
2020 jylǵy 3-shi qarasha kúngi derek boıynsha, sońǵy úsh táýlikte oblysta koronavırýs ınfektsııasyn juqtyrǵan jaǵdaı tirkelmegen.
