Túrkistan oblysyndaǵy iri jol apatyna qatysty is qozǵaldy
TÚRKІSTAN. QazAqparat - Túrkistan oblysyndaǵy iri jol apatyna qatysty qylmystyq is qozǵaldy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, soqtyǵysqa eki kólikte barlyǵy 2 júrgizýshi men 11 jolaýshy bolǵan. Qazirgi tańda osy oqıǵa boıynsha Qylmystyq kodekstiń 345-baby («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy») boıynsha Sotqa deıingi tergep-tekserýlerdiń biryńǵaı tizilimine tirkelip, birneshe saraptamalar taǵaıyndalǵan. Sotqa deıingi tergeý amaldary júrgizilýde.
Eske salaıyq, «Jol kólik oqıǵasy Tólebı aýdanynyń aýmaǵynda, Almaty-Tashkent-Termez tas jolynyń 733 shaqyrymynda boldy. «Mazda» jeńil kóligi «Ssang yong» mıkro avtobýsynyń artqy tusynan kelip soqqan. Nátıjesinde jol apaty kezinde úsh adam: «Mazda» kóliginiń júrgizýshisi jáne eki áıel kóz jumdy. Áıelderdiń biri Ózbekstan azamatshasy. Sondaı-aq, 9 adam týrli jaraqatpen aýrýhanaǵa jetkizildi. Olardyń 6-ýy ózbekstandyqtar.
