Túrkistan oblysyndaǵy iri jol apaty: Jaraqattanǵandardyń altaýy - ózbekstandyqtar
TÚRKІSTAN OBLYSY. QazAqparat - Túrkistan oblysy Qazyǵurt aýdanynda oryn alǵan iri jol apatynan zardap shekkender arasynda Ózbekstannyń 6 azamaty bolǵan. Bul týraly óńirdiń Densaýlyq saqtaý basqarmasynan málim etti, dep habarlaıdy QazAqparat tilshisi.
«Shymkent qalalyq jedel járdem aýrýhanasyna Qazyǵurt aýdanyndaǵy jol apatynan naýqastar kelip tústi. Jeńil jaraqat alǵan 3 adamǵa alǵashqy járdem kórsetilip, olar ambýlatorlyq emge joldandy. Úsh naýqas jansaqtaý bólimine jatqyzyldy. Taǵy eki adam neırohırýrgııa jáne bir jolaýshy jaraqat bólimshelerine jatqyzyldy. Naýqastardyń altaýy Ózbekstan Respýblıkasynyń azamaty», - delingen taratylǵan habarlamada.
Al aýrýhanada em qabyldap jatqan jolaýshylardyń sózinshe, jol apatyna «Mazda» kóliginiń dońǵalaǵy jarylyp ketýi sebep bolýy múmkin.
«Áıelim ekeýmiz «Mazda» kóliginde otyrǵanbyz. Saryaǵashtan Shymkentke kele jatyr edik. Men uıyqtap ketippin, bir ýaqytta tars etken daýys estildi. Kózimdi ashyp qarasam, kóliktiń ishinde aýdarylyp bara jatyrmyz. Áıelim basqa jaqtan ushyp ketipti, bir jolaýshy ekinshi jaǵynan túsip qalǵan. Júrgizýshi qansyrap jatyr, ólip qalǵan sııaqty. Áýpirimdep júrip syrtqa áreń degende shyqtym», - deıdi jolaýshylardyń biri Farýh Kýrchıev.
Eske salaıyq, jol kólik oqıǵasy búgin Qazyǵurt aýdanyndaǵy Rabat aýylynyń mańynda boldy. Oqıǵaǵa kýá bolǵandardyń aıtýynsha, «Mazda» jeńil kóligi «Sang Yong Istana» mıkroavtobýsyn artqy jaǵynan kelip soqqan. Qatty soqqydan jolaýshylar mingen kólik birneshe ret aýdarylyp túsken.
Aldyn ala málimet boıynsha, shaǵyn avtobýsta - 9, jeńil mashınada 4 adam bolǵan. «Mazda»-nyń júrgizýshisi oqıǵa ornynda qaza tapty. Taǵy bir áıel jedel járdem kóligi ishinde jan tásilim etse, úshinshi áıel aýrýhanaǵa jetken kezde kóz jumǵan. Ózge jolaýshylar Shymkent qalasyndaǵy jedel járdem aýrýhanasyna jetkizilgen. Qazir qaza bolǵandardyń tulǵalary men jol apatynyń sebep-saldary anyqtalyp jatyr. 
