Túrkistan oblysyndaǵy fırmalardyń birinde seıften 7 mıllıon teńgege jýyq aqsha urlaǵan
TÚRKІSTAN. QazAqparat – Túrkistan oblysy, Maqtaaral aýdanynda belgisiz tulǵalar fırmalardyń birin tonap ketken. Kúdiktiler seıften 7 mıllıon teńgege jýyq aqshany qoldy etken, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, Maqtaaral aýdanynyń turǵyny polıtsııaǵa aryzdanǵan. Ol óziniń qyzmettik bólmesinde temir seıfke saqtap júrgen qomaqty aqshasyn belgisiz bireýler urlap ketkenin aıtqan. Osy habarlama boıynsha aýdandyq jedel tergeý toby oqıǵa ornyna jetip, jedel izdestirý sharalaryn júrgizgen. Aptaǵa jýyq ýaqyt aralyǵynda júrgizilgen izdestirý sharalary barysynda kúdiktiniń kim ekeni anyqtalǵan. 7 mln teńgeni urlaǵan sol mekemeniń kúzetshisi bolyp shyqty.
«Tergeý barysynda anyqtalǵandaı, seıftiń esigi ashyq qalǵanyn baıqap qalǵan kúzetshiniń oıy buzylǵan. Jeńil jolmen aqsha tabý maqsatynda ol 7 mln teńgege jýyq aqshany alyp ketip, úıine jasyrǵan. 90 myń teńgege jýyq aqshasyn óziniń qajetine jaratyp úlgergen. Tártip saqshylary kúdikti azamattyń úıinen aıǵaqty zat retinde urlanǵan aqshany tárkilep alyp, zańdy ıesine qaıtarǵan. Qazirgi tańda atalǵan jaıt sotqa deıingi tergeýdiń biryńǵaı tizilimine engizilip, QR QK-niń 188-baby (urlyq) boıynsha tergep-tekserý amaldary júrgizilýde. Kúdiktiden qolhat alyndy» delingen habarlamada.
