Túrkistan oblysyndaǵy epıdemıologııalyq ahýalǵa baǵa berildi
TÚRKІSTAN. QazAqparat – QR Densaýlyq saqtaý mınıstrliginiń eldegi epıdemıologııalyq ahýaldy baǵalaý kórsetkishteri boıynsha Túrkistan oblysy «jasyl aımaq» deńgeıinde tur. Bul týraly oblystyń bas sanıtarııalyq dárigeri Nurbek Nyshanov málimdedi, dep habarlaıdy QazAqparat tilshisi.
Nurbek Nyshanovtyń sózinshe, óńirde 1 tamyz ben 7 jeltoqsan aralyǵynda pnevmonııa aýrýymen 873, al COVID-19 indetin juqtyrǵan 3517 jaǵdaı tirkelgen.
«Óńirimizde búginge deıin koronavırýs indetin juqtyrǵandyń 1332-si sımptomdy, 2185-i sımptomsyz jaǵdaıdaǵy naýqastar. Onyń búginde 3415-si statsıonarda jáne úı jaǵdaıynda emdelip shyqty. Qazirgi tańda 10 adam statsıonarlyq em qabyldap jatyr, 44 azamat ambýlatorııalyq jaǵdaıda emdelýde. Qarym-qatynasta bolǵan 231 adam medıtsınalyq baqylaýda», – dedi Nurbek Nyshanov.
Sondaı-aq, brıfıngke qatysqan oblystyq Qoǵamdyq densaýlyq basqarmasynyń basshysy Marat Pashımov koronavırýs indetiniń yqtımal ekinshi tolqynyna óńirimiz tolyqqandy daıyn ekenin aıtty.
«Búginde oblysymyzda 600 ınfektsııalyq jáne 340 karantındik tósek oryn uıymdastyrylǵan. Qajettilik týyndaǵan jaǵdaıda tósek-oryn sanyn 5610-ǵa deıin ulǵaıtýǵa múmkindik bar. Aýrýhanalar 2 aıǵa jetetin dári-dármek qorymen jáne qajetti medıtsınalyq qural-jabdyqtarmen qamtamasyz etilgen. Sondaı-aq, Túrkistan qalasynda jyl sońyna deıin 200 oryndyq jańa ınfektsııalyq aýrýhanany paıdalanýǵa berý josparlanýda», – dedi basqarma basshysy.
Aıta keteıik, búginde óńir turǵyndaryn dárilik zattarmen medıtsınalyq buıymdarǵa qoljetimdiligin qamtamasyz etý úshin bólshek saýda dárihanalary arqyly jergilikti turaqtandyrý qory qurylyp, oblys bıýdjeti esebinen 349 mln teńge bólingen.
