Túrkistan oblysyndaǵy emhanada qyzmet kórsetý ortalyqtary ashyldy
TÚLKІBAS. QazAqparat – Túrkistan oblysy, Túlkibas aýdanyndaǵy ortalyq emhanada «Túrkistan adaldyq alańy», «Áleýmettik qyzmetter ortalyǵy» jáne «Óz-ózine qyzmet kórsetý buryshy» ashyldy. Turǵyndar endi tsıfrlyq júıe arqyly tıisti dárigerge jazylýǵa jáne qajetti em qabyldaý nusqaýlyǵyn alýǵa bolady, dep habarlaıdy QazAqparat tilshisi.
Sala mamandarynyń sózinshe, jergilikti halyq emhanaǵa kelmeı-aq arnaıy saıtqa uıaly telefon arqyly tirkelip, úıde otyryp-aq dárigerdiń qabyldaýy jaıyndaǵy málimetpen tanysa alady. Al, «Adaldyq alańynda» arnaıy psıhologtarmen keńesip, tolǵandyryp júrgen máselelermen bólisýge jáne suhbattasýlaryna bolady.
Saltanatty sharada aýdandyq aýrýhananyń bas dárigeri Baqyt Turlybekov aýdan basshylaryn jańa ortalyqtardyń jumys barysymen tanystyryp, halyqqa sapaly qyzmet kórsetý isi aldaǵy ýaqytta da jalǵasa túsetindigin jetkizdi.
«Elimiz kúnnen-kúnge damý ústinde. Bul tek úlken qalalarda ǵana emes, aýdandyq, aýyldyq jerlerde de kórinis berip jatyr. Oblys ortalyǵynan shalǵaıda ornalasqan aýdanymyzda ár kún saıyn jańa qyzmet túrleri kórsetilip, halyqqa barynsha jaǵdaı jasalýda. Endi osy jańadan ashylǵan ortalyqtar turǵyndardyń der kezinde em qabyldaýyna septigin tıgizedi»,– dedi aýdandyq aýrýhananyń bas dárigeri.
Óz kezeginde aýdan ákimi Nurbol Turashbekov pen máslıhat hatshysy Sádýaqas Seısenbaev bastaǵan zııaly qaýym ókilderi men aqsaqaldar aýrýhana ishin aralap kórdi. Tsıfrly teledıdar-nusqaýshymen jiti tanysyp, júıeni jumysyn halyqty nasıhattaý kerektigin tapsyrdy. Sala mamandaryna naqty tapsyrmalar berdi.
«Qarapaıym halyqty tsıfrly aqparat alýǵa úıretý kerek. Ol úshin okrýg, aýyl-aımaqqa túsindirý jumystary júrgizilsin. Baspasóz betterin paıdalana otyryp, halyqqa úndeý jasańyzdar»,- dedi aýdan ákimi Nurbol Turashbekov.
