Túrkistan oblysyndaǵy ekologııalyq jaǵdaı salystyrmaly túrde qolaıly - mınıstr

TÚRKІSTAN. QazAqparat- Túrkistan men Kentaýda atmosferalyq aýanyń lastaný deńgeıi joǵary. Bul týraly Ekologııa, geologııa jáne tabıǵı resýrstar mınıstri Serikqalı Brekeshev Túrkistan oblysynyń turǵyndarymen kezdesýinde aıtty, dep habarlaıdy QazAqparat tilshisi.

Mınıstrdiń sózinshe basqa óńirlermen salystyrǵanda Túrkistan oblysyndaǵy ekologııalyq jaǵdaı salystyrmaly túrde qolaıly. Jyl basynan beri oblystaǵy kásiporyndardan shyǵatyn lastaýshy zat shyǵaryndysynyń kólemi de tómendegen.

«Biz oblystyń ekologııalyq máselelerine taldaý jasadyq. Olar atmosferalyq aýanyń lastanýy, qaldyqtardy basqarýdyń jetilmegen júıesi jáne eskirgen káriz tazartý qurylǵylary. Jalpy ekologııalyq monıtorıng nátıjeleri Túrkistan men Kentaý qalasynda atmosferalyq aýasynyń lastaný deńgeıi joǵary ekendigin kórsetti»-dedi Serikqalı Brekeshev.

Kezdesýde Kentaý jáne Túrkistan qalalarynyń tazartý qurylǵylary qanaǵattanarlyqsyz jaǵdaıda ekendigi de aıtyldy. Al Ordabasy, Báıdibek, Keles, Qazyǵurt jáne Maqtaaral sııaqty 5 aýdan ortalyǵynda káriz tazartý qurylǵylary joq.

«Tazartý qurylǵylaryna jóndeý jáne qaıta qurý jumystaryn júrgizý qajet. Qaıta qurý máselesi aıtarlyqtaı qarajatty talap etedi»-dedi mınıstr.