Túrkistan oblysyndaǵy eki eldimekenge taza aýyz sý berildi

ARYS. QazAqparat – «Tuńǵysh Prezıdent kúnine» oraı Túrkistan oblysyndaǵy Kókjıde jáne Aqqala eldimekenderinde taza aýyz sý berildi. Arys qalasyna qarasty aýyldarda ótken saltanatty sharaǵa qala ákimi Murat Qadyrbek qatysyp, jergilikti halyqty merekemen quttyqtady, dep habarlaıdy QazAqparat tilshisi

Aqqala aýylynyń turǵyndaryn sapaly aýyz sýmen qamtý maqsatynda ótken jyly respýblıkalyq bıýdjetten 213,4 mln teńge bólinip, tıisti jumys óndiristik kestege saı júrgizildi. Nátıjesinde aqqalalyq myńnan asa turǵyn taza aýyz sýmen qamtamasyz etildi.

«Bıylǵy jyly qala turǵyndary qajyrly eńbek etip, jyldy tabysty aıaqtaǵaly otyrmyz. Bul da el ishindegi yntymaq pen bereke, birliktiń arqasy. «Tuńǵysh Prezıdent kúni» merekesi qarsańynda qýanyshtaryńyzdy bólisýge kelip, barlyqtaryńyzdy osynaý aıtýyl kúnmen quttyqtaǵym keledi», - dedi Murat Qadyrbek.⠀

Al, Baıyrqum aýyldyq okrýgine qarasty Kókjıde eldimekeninde qoldanysqa berilgen sý qubyryn tartýǵa oblystyq bıýdjetten 238,1 mln teńge qarjy bólingen. Aýylǵa uzyndyǵy 20,681 shaqyrymdy quraıtyn, qýattylyǵy táýligine 62,31 m3/jyl bolatyn aýyz sý qubyrynyń qurylysyn «SMK ı J7» kompanııasy belgilengen merzimde aıaqtady.

Jańadan paıdalanýǵa berilgen taza aýyz sý jelisi arqyly osy Kókjıde eldi mekenindegi 125 turǵyn úıdiń 1 340 turǵyny paıdalanady. Osylaısha kóp jyl boıy qudyqtan sý iship kelgen jergilikti halyq endigi ýaqytta arnaıy súzgiden ótetin taza, tabıǵı aýyz sý paıdalanady.

Aıta keteıik, 2021 jyly Arys qalasyna qarasty Dermene aýyldyq okrýgi, Ormandy eldi mekeninde aýyz sý júıesin salý úshin jobalyq smeta qujattamasy ázirlengen. Ondaǵy qurylys jumystaryn júrgizýge respýblıkalyq bıýdjetten 28 mln teńge qaralyp, joba boıynsha eldi mekende ornalasqan 4 kóshedegi 35 turǵyn úı nemese 272 turǵyndy taza aýyz sýmen qamtamasyz etý josparlanyp otyr.