Túrkistan oblysyndaǵy blokpostarda 12 qylmys tirkelip, 11 adam qamaýǵa alyndy
Ustalǵandar - Almaty men Shymkent qalasynda jappaı tártipsizdikke qatysqandar.
Olardan aıǵaqty zat retinde qarý men tonalǵan múlikter tárkilengen. Jalpy 25 000-nan astam avtokólik tekserilip, onyń 200-ge jýyǵy aıypturaqqa qoıylǵan.
«Búgingi tańda Túrkistan oblysy aýmaǵyndaǵy jaǵdaı turaqty. Oblys polıtseıleri 100 paıyz qoǵamdyq qaýipsizdikti qamtamasyz etýge jumyldyrylyp, syrqattanyp jatsa da syn saǵatta áriptesterimen birge qyzmet etti», – deıdi Túrkistan oblysy polıtsııa departamentiniń bastyǵy Qaırat Dálbekov.
Jetisaı aýdanyndaǵy blokposta qolǵa túsken úsh jolaýshydan túrli úlgidegi 11 uıaly telefon, 2 noýtbýk pen zarıadtaý qurylǵysy tárkilengen.
Sonymen qatar, Túrkistan oblysynyń taǵy eki turǵyny polıtsııa bólimine jetkizildi.
Qazyǵurt APB qyzmetkerleri Almaty-Termez-Tashkent tasjolyndaǵy Aqtas blokbeketinde «Toıota» markaly avtokólikte tapanshamen júrgen Saryaǵash jáne Keles aýdandarynyń 4 turǵynyn ustaǵan.
Qazir kúdiktilerge qatysty sotqa deıingi tergeý amaldary júrip jatyr.
Sondaı-aq, polıtsııa general-maıory jappaı tártipsizdik kezinde Jetisaı, Arys, Saryaǵash aýdandaryndaǵy, Kentaý jáne Túrkistan qalalarynda birqatar azamattar jınalyp, búlik shyǵarýǵa tyrysqanyn aıtyp ótti.
«Máselen, oblys ortalyǵynda 500-den astam adam kóshege jınalyp, joldardy, sondaı-aq temirjoldardy jappaqshy bolǵan. Naqty jáne jedel is-áreketterdiń arqasynda Túrkistan oblysy polıtsııa departamentiniń qyzmetkerleri shuǵyl qımyldap, jappaı tártipsizdik pen zańbuzýshylyqqa múlde jol bermedi»,- dedi Q.Dálbekov.
