Túrkistan oblysyndaǵy birqatar aýdan ákimi Ómirzaq Shókeevtiń synyna ushyrady

TÚRKІSTAN. QazAqparat - Túrkistan oblysynyń ákimi Ómirzaq Shókeevtiń tóraǵalyq etýimen ótken jıynda respýblıkalyq bıýdjet qarajatynyń ıgerilý barysy talqylandy, dep habarlaıdy QazAqparat oblys ákiminiń baspasóz qyzmetine silteme jasap.

Jıynda Túrkistan qalasynyń damýy men ataýly áleýmettik kómek taǵaıyndaý jáne tóleý qaǵıdalaryndaǵy ózgerister men tolyqtyrýlar týraly, aýyl sharýashylyǵy salasyndaǵy sońǵy kórsetkishter de kóterildi. Jınalysta birqatar aýdan ákimderi men basqarma basshylary Ómirzaq Shókeevtiń synyna ushyrady.

«Igerilmegen qarjy máselesi oblys ákimin ashýlandyrdy. Ol jalpy 2019 jylǵy baǵdarlamalardyń negizgi sharalary atqarylǵanyn aıta kelip, sonymen qosa jyl qorytyndysy boıynsha belgili bir ıgerilmegen qarajattar bar ekenin taǵy eske saldy», delingen habarlamada.

Oblys basshysy qalǵan qarjy tóńireginde túsinik bergen aýdan ákimderiniń áńgimesin tótesinen úzdi.

«Qarjylyq baqylaý qyzmeti teksere me, konkýrsty ýaqytynda ótkizbedi me, onyń bári xalyqtyń máselesi emes. Eń bastysy, aqsha bólindi, biraq ol ıgerilmeı qaldy. Bálkim, keler jyly mundaı aýdandarǵa qosymsha aqsha múldem bermegen durys bolar. Sondyqtan onyń negizgi sebebi ákimderdiń tarapynan tıisti baqylaýdyń bolmaýynan dep esepteımin. Taǵy bir másele – bólingen qarajatty josparlaý sapasy men ıgerýdiń merzimi», – dep eskertti Ómirzaq Shókeev.

Sondaı-aq, ataýly áleýmettik kómek taǵaıyndaý jáne tóleý qaǵıdalaryndaǵy ózgerister men tolyqtyrýlar týrasynda da atqarylyp jatqan jumystar oblys ákiminiń kóńilinen tolyq shyǵa qoımady. Ol ár aýdan, aýyldarda túsindirme jumystarynyń kóńil kónshitpeı turǵanyn jetkizip, bul isti qatań baqylaıtynyn qadap aıtty.

Aýdan basshylarynyń jaýabyna qanaǵattanbaǵan Ómirzaq Shókeev tıisti sala basshylaryna basa mán berýdi qajet etetin tustardy atap, naqty tapsyrmalar berip, mindetter júktedi.