Túrkistan oblysyndaǵy aýrýhanalar tynys alý apparattarymen tolyqtaı qamtylǵan
TÚRKІSTAN.QazAqparat – Túrkistan oblysyna qarasty medıtsınalyq mekemeler taıaýda 58 ókpeni jasandy jeldetý apparattarymen tolyqty. Otandyq ónim óndirýshi kompanııa jasap shyǵarǵan IVL apparattarymen 24 medıtsınalyq uıym jabdyqtalǵan, dep habarlaıdy QazAqparat tilshisi.
Oblystyq qoǵamdyq densaýlyq basqarmasynyń málimetinshe, emdeý mekemelerindegi apparattardyń barlyǵy tolyqqandy iske qosylǵan. Medıtsına qyzmetkerleri olardy qoldaný boıynsha arnaıy oqytýlardan ótken.
«Túrkistan qalalyq ortalyq aýrýhanasy bıyl 10 ókpeni jasandy jeldetý apparatymen tolyqty. Onyń ishinde taıaýda 2 apparat otandyq ónim óndirýshiden jetkizildi. Qazirgi tańda jalpy sany 18 apparat tolyq iske qosylǵan. Búginde ınfektsııalyq bólimde koronavırýs ınfektsııasynan em qabyldap jatqan naýqas joq. Aýrýhanada koronavırýs ınfektsııasynyń yqtımal ekinshi tolqynyna daıyndyq jumystary barynsha kúsheıtilgen. 2-3 aılyq dári-dármek qory da ázirlenip otyr», - deıdi Túrkistan qalalyq ortalyq aýrýhanasynyń bas dárigeri Janbolat Dildábekov.
Sondaı-aq, óńirde medıtsınalyq uıymdardyń materıaldyq-tehnıkalyq bazasy úzdiksiz jabdyqtalǵan. Máselen, 8 aýrýhanada qosymsha ottegi stantsııalary ornatylǵan. Jýyrda 80 birlik oksıgenatsııa apparaty (HI-FLOW) satyp alynǵan. Budan bólek, ottegi kontsentratorlarynyń sany 900-ge jetkizilip, ottegi núkteleriniń sany 2 095 núktege deıin arttyrylǵan.
