Túrkistan oblysyndaǵy aýrýhanalar sapaly jumys isteıtin mekemeler qataryna endi
Medıtsınalyq saqtandyrý qory Qazaqstannyń medıtsınalyq uıymdarynyń reıtıngin jasady. Memlekettiń tapsyrysy boıynsha halyqqa 1404 mekeme qyzmet kórsetedi.
2019 jyldyń alǵashqy jartyjyldyǵynda medıtsınalyq saqtandyrý qory memlekettik tapsyrys boıynsha jumys isteıtin medıtsınalyq uıymdardyń qadaǵalady. Mamandar medıtsınalyq kómek kezinde 218 myń aýytqýshylyqty anyqtaǵan.
«Medıtsınalyq kómektiń sapasyn baqylaý qorytyndysy boıynsha statsıonarlyq jáne stantsıonardy almastyratyn medıtsınalyq mekemelerdiń reıtıngin túzdik. Tizim uıymdardyń nátıjıe koeffıtsıentine baılanysty jasyl, sary jáne qyzyl úsh aımaqqa bólindi. 58 medıtsınalyq mekeme qyzyl aımaqqa ilindi», – dedi, «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń dırektory A.Beısenbaev.
Baqylaý barysynda Qostanaı qalalyq aýrýhanasy, Balqash ortalyq aýrýhanasy, Nur-Sultan Ortalyq jol emhanasy men Tekeli qalalyq aýrýhanasynda birqatar kemshilikter tabyldy. Medıtsınalyq saqtandyrý qory bul kemshilikter úshin qarjylandyrý kólemin azaıtady. Jarty jylda ıgerilmegen 2,8 mıllıard teńge negizgi baǵyttar boıynsha medıtsınalyq uıymdar arasynda úlestiriledi.
Nátıjeli ári sapaly jumys isteıtin merdigerlerdiń tizimine 98 medıtsınalyq uıym endi. Saraptama qorytyndysy olardyń 70% jekemenshik klınıka ekenin anyqtaǵan. Al úzdikteri mynalar: Shymkenttegi kóz aýrýlary ǵylymı-zertteý ınstıtýty, Jambyl temirjol aýrýhanasy, Túlkibas ortalyq aýdandyq aýrýhanasy, Respýblıkalyq balalardy ońaltý ortalyǵy men Ulttyq medıtsınalyq ýnıversıteti.
Kórsetiletin qyzmettiń sapasyn kóterý úshin medıtsınalyq saqtandyrý qory jasyl aımaqtaǵy merdigerlerdi yntalandyryp, al qyzyl aımaqtaǵylarǵa shara qoldanýdy josparlap otyr.
«Bolashaqta medıtsınalyq kómektiń sapasy klınıkamen kelisimshartqa otyrarda nazarǵa alynatyn bolady. Medıtsınalyq saqtandyrý qory naýqastyń múddesi úshin medıtsınalyq kómekti satyp alatyndyqtan olardyń quqyǵyn bilýi men zańsyz jaǵdaılardy habarlaýy mańyzdy», delingen habarlamada.
