Túrkistan oblysyndaǵy Almaly aýylynda 5 jyldan beri ishimdik satylmaıdy

TÚRKІSTAN. QazAqparat- Jetisaı aýdany, Maqtaly aýyldyq okrýgine qarasty Almaly aýylynda ishimdik satylmaıdy. Sondaı-aq, sońǵy 5 jylda munda birde-bir qylmys tirkelmegen, dep habarlaıdy QazAqparat tilshisi.

Túrkistan oblysyndaǵy Jetisaı aýdany Maqtaly aýyldyq okrýgine qarasty Almaly aýylynda 150-den astam shańyraq bar. Shamamen myńnan astam halyq turady. Munda alkogoldi ishimdik satylmaıdy. Sonymen qatar, shekaralyq aımaqta ornalasqan bul aýyldaǵy barlyq máseleler aqsaqaldar keńesi arqyly óz sheshimin taýyp keledi.

«Aýyl turǵyndarynyń barlyǵy mal ustaıdy. Sol kezdegi aýyl bıleri bas bolyp, ishimdiksiz aýyl bolý bastamasyn qolǵa alǵan bolatyn. Sol jyldan bastap osy ýaqytqa deıin aýylda birde-bir qylmys tirkelgen joq», – deıdi aýyl ákimi Meırambek Qydyrqojauly.

Aýylda úsh dúken bar, biraq olardyń eshqaısysynda alkogol satpaıdy.

Aýyl azamattarynyń aıtýynsha, otbasylyq kıkiljińder de azaıyp, sońǵy 2 jylda ajyrasý múldem tirkelmegen.