Túrkistan oblysyndaǵy ákimdikter tolyqtaı «Servıstik ákimdik» úlgisine kóshti

Jańa júıege sáıkes memlekettik organdardyń jumysy túbegeıli transformatsııalanyp, halyqqa barynsha qolaıly qyzmet kórsetýdiń jańa satysyna kóterildi, dep habarlaıdy QazAqparat tilshisi.

Oblysqa qarasty barlyq qala-aýdandarda ashylǵan «servıstik ákimdikter» aýdan ákimdiginiń apparatynda uıymdastyrylǵan. Halyqtyq keńselerde azamattardy qabyldaý men ótinishterdi jedel qaraý jáne quqyqtyq keńes berý, memlekettik qyzmetterdi qoljetimdi kórsetý múmkinshilikteri qarastyrylǵan. Sondaı-aq, jer qatynastary, aýyl sharýashylyǵy, turǵyn-úı sharýashylyq sııaqty birneshe sala bólimderiniń mamandary azamattarǵa kedergisiz memlekettik qyzmet túrlerin kórsetip keledi.

Budan bólek, oblys ákiminiń qatysýymen Túrkistan qalasynda «Ashyq ákimdik» júıesine negizdelgen «Parasattylyq ortalyǵy» ashylyp, halyqtyń ózekti máselelerin sheshý boıynsha shuǵyl áreket etý, azamattardyń quqyqtaryn júzege asyrýda memlekettik organdardyń ózara birlese árekettesýin qamtamasyz etý boıynsha júıeli jumys júrgizýde.

Atalmysh ortalyqtyń jumysyna jergilikti bılik ókilderiniń laýazymdy tulǵalary, «Túrkistan - Adaldyq alańy» jobalyq keńsesiniń menedjerleri, advokattar jáne qoǵam ókilderi tartylǵan. Sonymen qatar, búginnen bastap Túrkistan oblysyna qarasty basqarmalar úıi servıstik formatqa kóship, memlekettik qyzmettiń qoljetimdiligin qamtamasyz etetin «Ashyq ákimdik» keńsesimen tolyqty.

Jańa úlgidegi keńsede halyqpen ashyq pikir almasýǵa, jazylýsyz memlekettik organ ókilderimen tikeleı kezdesýge qolaıly jaǵdaılar jasalǵan. Bul qyzmetter boıynsha ótinishtermen jumys isteıtin 21, tikeleı memlekettik qyzmet túrin kórsetetin 16 oblystyq basqarmalardyń mamandary qamtylǵan.