Túrkistan oblysyndaǵy ákimdik «Open Space» úlgisinde jumys isteýde

KELES AÝDANY. QazAqparat – Túrkistan oblysy Keles aýdany ákimdigine qarasty Birlesý aýyldyq okrýgi ákiminiń apparaty jańa ǵımaratqa kóshýde, dep habarlaıdy QazAqparat ákimdiktiń baspasóz qyzmetine silteme jasap.

«Open Space» – ashyq keńistik úlgisindegi jańa qabyldaý bólmeleri birinshi qabatta ornalasqan ári qabyrǵasy áınekten jasalǵan. ıAǵnı, bul format arqyly jergilikti turǵyndar ákim jáne onyń qyzmetkerlerimen ashyq túrde tyǵyz baılanysta bola alady.

Ákimdiktiń ortalyqqa oryn aýystyrýy eń aldymen jergilikti halyq úshin yńǵaıly bolmaq. Onyń ústine jańa ǵımaratta «Nur Otan» partııasy fılıaly men ardagerler keńesi ornalasatyn bolady. Osylaısha Keles aýdany «Bir tereze» qaǵıdasy boıynsha jumys formatyna kóshýdi kózdeýde.

Eski ǵımarattyń tolyq jóndeý jumystary júrgizilip bolǵan soń, bilim uıasyna beriletin bolady. Ázirge aýdandaǵy 12 aýyl okrýginiń ishinde Aqtóbe jáne Júzimdik aýyldyq okrýgteriniń ákimdik ǵımarattary jóndeýden ótip, jańa formatpen jumys isteýde. Aldaǵy ýaqytta aýdandaǵy barlyq aýyldyq okrýgterdiń ákimderi jappaı birinshi qabatqa túsirilip, «Open Space» jobasynda jumys isteýge kóshedi.

Sonymen qatar, ashyqtyq pen jarııalylyqqa umtylǵan ákimdiktiń aldaǵy josparlarynyń taǵy biri – halyqqa qyzmet kórsetý ortalyǵynyń jumysyn ońtaılandyrý.