Túrkistan oblysyndaǵy 865 shaqyrym joldyń merziminen buryn tozý qaýpi bar

TÚRKІSTAN. QazAqparat – Túrkistanda oblystyq mańyzy bar 200 shaqyrym jol aýyr júk kólikteriniń talaptardy saqtamaýynan jaramsyz jaǵdaıǵa túsip otyr. Taǵy 865 shaqyrym joldyń merziminen buryn tozý qaýpi bar, dep habarlaıdy QazAqparat tilshisi.

Bul joldardyń basym bóligi Saıram, Ordabasy, Arys, Qazyǵurt, Saýran aýdandarynda ornalasqan. Jyl basynan beri júrgizilgen reıdtik is-sharalardyń nátıjesinde zańdy buzǵan kompanııalarǵa 151 mln teńgeden astam aıyppul salynǵan.

Túrkistan oblysy boıynsha kóliktik baqylaý ınspektsııasy tarapynan jasalǵan taldaý kórsetkendeı, óńirdegi 160 karerdiń 20-synda ǵana tarazy bar. Al, qalǵan 140 karerde baqylaý-ótkizý pýnkteri, jóneltiletin jáne kelip túsetin júktiń sapasy men massasyn anyqtaıtyn tarazy men basqa da jabdyqtar qarastyrylmaǵan.

«Zańsyz tasymal, jolaýshylar qaýipsizdigine qatysty shaǵymdar kóbeıdi. Jol polıtsııasy men kóliktik baqylaý ınspektsııasy tarapynan olardyń bári tekserilýi tıis. Joldyń sapasyn buzatyn iri júk kólikterine de qadaǵalaý kúsheıtilsin. Ár karer mańynda júktiń salmaǵyn ólsheıtin tarazysy bolýy kerek. Jolaýshylardyń qaýipsizdigi, joldyń sapasy boıynsha reıdter jalǵasqany jón», - dedi oblys ákimi Ómirzaq Shókeev osy máselege qatysty ótken májilis barysynda.

Óńirde endigi kezekte ózennen tas tasıtyn aýyr salmaqty avtokólikter de jappaı tekserilmek. Karerlerde salmaq ólsheıtin tarazynyń ornatylýy qatań qadaǵalanady. Zań buzýshylyq jasaǵandardyń isi quzyrly organdarǵa joldanady.