Túrkistan oblysynda jylyjaıdaǵy ónimi úsip ketken sharýalarǵa jeńildikpen nesıe berilýi múmkin

TÚRKІSTAN. QazAqparat - Túrkistan oblysynda jylyjaılary jaramsyz kúıge túsken sharýalarǵa jeńildetilgen nesıe berilýi múmkin, dep habarlaıdy QazAqparat tilshisi.

Jalpy óńirdegi jylyjaılardyń 94 paıyzy fermerlik qoldan jasalǵan jeńil konstrýktsııaly bolǵandyqtan qalyń jaýǵan qardyń salmaǵyn kótere almaǵan.

Nátıjesinde 167 taýar óndirýshiniń 37 gektardy quraıtyn jylyjaıy jaramsyz kúıge túsken.

Al, kómirdiń tapshylyǵynan 9 gektardy quraıtyn 3 ónerkásiptik jylyjaıdyń ónimderin úsik shalǵan.

Túrkistan oblysy aýyl sharýashylyǵy basqarmasy basshysynyń mindetin atqarýshy Nurjigit Myrzahmetovtyń aıtýynsha búgingi kúni sharýalarǵa qoldaý kórsetip, kómek berý jumystary júrip jatyr.

«Memleket tarapynan jylyjaı taýaryn óndirýshilerdiń qarjy uıymdary aldyndaǵy bereshekteriniń (nesıe qarjy) óteý merzimderin uzartý múmkindigi qarastyrylýda. 2,5 paıyzben jeńildetilgen nesıe berý jumysy da zerdelenedi. Jalpy basqarma tarapynan jylyjaı sharýashylyqtaryn qoldaý sharalary boıynsha mınıstrlikke naqty usynystar joldandy. Onyń ishinde jylyjaı keshenderinde paıdalanylǵan energııa kózderiniń (elektr energııasy, gaz) 50%-yn sýbsıdııalaý, jylyjaılarǵa qajetti áleýmettik kómir otynyn QR Indýstrııa jáne ınfraqurylymdyq damý mınıstrligi, «Qazaqstan temir joly» ulttyq kompanııasy» AQ arqyly merziminde tikeleı jetkizý joldaryn qarastyrý kózdelgen», – dedi Nurjigit Myrzahmetov.

Aıta keteıik, jalpy óńirde 1500 gektardan astam jylyjaı bar.

Budan aldyn mol jaýǵan qar túrkistandyq 167 sharýanyń jylyjaıyn jaramsyz kúıge túsirgenin jazǵan bolatynbyz.

Sondaı-aq, kómir tapshylyǵynan Túrkistan oblysynda jylyjaıdaǵy ónimder úsip ketken bolatyn.