Túrkistan oblysynda jylytý maýsymyna jaýapty tulǵalarǵa qyzmettik tekserý júrgiziletin boldy
Óńirdegi aýdan, qala ákimderi jáne jaýapty basshylardyń qatysýymen jınalys ótkizgen Túrkistan oblysynyń ákimi Darhan Satybaldy syn saǵatta súringen barlyq basshylardy qatań synǵa aldy. Jumys barysynda salǵyrttyqqa jol bergenderge qyzmettik tekserý júrgizilip, jazalanatynyn aıtty.
«Jylytý maýsymyna 100% daıyn dep aqparat bergen edińizder, ókinishke oraı aqparat – jalǵan bolyp shyqty. Al, jumys óz deńgeıinde júrgizilmegindigi anyqtalyp otyr. Aýdan, qalalarǵa kómir jetkizý tolyq sheshilmegen. Turǵyndar, jylyjaı ıeleri kómir tapshylyǵyna jáne baǵasyna narazylyq bildirýde. Qajetti kómir kólemine oraı basqarmalar men aýdandardan jınaqtalǵan málimetter de durys bolmaı shyqty. Tabıǵı gaz qubyrǵylary boıynsha problemalar týyndaýda»-dedi oblys ákimi.
Sondaı-aq, Darhan Satybaldy Saryaǵash, Qazyǵurt aýdandarynda gaz qubyrlary qatyp qalǵanyn, aýyz sý qubyrlary isten shyǵyp, osy aptada 5 myńǵa jýyq abonent sýsyz qalǵanyn jetkizip, jaýapty sala mamandarynyń jumysyn synǵa aldy.
«Arys qalasynyń birqatar turǵyndary jylý berý sapasyna narazy. Kentaý qalasyndaǵy jylý ortalyǵynyń eki qazandyǵy isten shyqty. Jylý berý maýsymynda oryn alyp jatqan osy jaıttarǵa baılanysty barlyq qala, aýdan ákimderine atalǵan kemshilikterdi shuǵyl joıýdy tapsyramyn. Oǵan jaýapty energetıka basqarmasynyń basshysyna, Kentaý qalasynyń ákimine, osy salaǵa jaýapty meniń orynbasaryma qatysty qyzmettik tekserý júrgizilsin», – dedi Darhan Satybaldy.
