Túrkistan oblysynda jylytý maýsymy bastalǵaly 1 adam gazǵa ýlanyp qaıtys boldy
Jalpy Túrkistan oblysynda jylytý maýsymy bastalǵaly turǵyn úı sektorynda 65 órt oqıǵasy tirkelgen. Jalpy shyǵyn kólemi 128 mln teńgeni qurap otyr. Al, bir adam ýly gazǵa túnshyǵyp qaza bolǵan.
Bul týraly oblystyq óńirlik kommýnıkatsııalar ortalyǵynda ótken brıfıngte Tótenshe jaǵdaılar departamentiniń memlekettik órt baqylaý basqarmasynyń bastyǵy Asanǵalı Tólepbergenov málimdedi.
«Qazan aıynda Saryaǵash aýdany Qaplanbek aýyly Baryshov kóshesi №36 mekenjaıynda ýly gazben ýlaný oqıǵasy tirkeldi. Saldarynan 1961 jylǵy azamat qaıtys boldy. Gaz mamandarynyń aıtýynsha, turǵyn úıdegi tabıǵı gazǵa arnalǵan peshtiń murjasy uzaq ýaqyt tazartylmaǵan» - dedi A.Tólepbergenov.
Jalpy departament mamandary jyl basynan beri 260 myńǵa jýyq jeke turǵyn úıdi aralap órt qaýipsizdigine qatysty úgit-nasıhat jumystaryn júrgizgen. 430 myńnan astam kemshilikterdi anyqtaǵan mamandar 1 mln astam turǵynǵa nusqama bergen.
«Úılerdi aralap úgit nasıhat jumystaryn júrgizý kezinde jyldaǵy kemshilikter qaıtalanyp otyrǵandyǵyna kóz jetkizdik. Onyń ishinde, murjalardy durys qoldanbaý, murjalardy túrli zattarmen biteý, gazben jylytylatyn qondyrǵylardyń murjalaryn qatty otynmen jylytylatyn qondyrǵynyń murjasyna jalǵaý, qatty otynǵa arnalǵan peshterge gaz forsýnkalaryn ornatý bar» - dedi Asanǵalı Tólepbergenov.
