Túrkistan oblysynda jyl sońyna deıin 2430 otbasyn baspanamen qamtamasyz etý kózdelgen
TÚRKІSTAN. QazAqparat – Túrkistan oblysynyń ákimi Ómirzaq Shókeevtiń tapsyrmasyna sáıkes, Túrkistan qalasyndaǵy kóppáterli turǵyn úılerdiń qasbetteri tutastaı ashyq tústi mármár tas pen travertınmen qaptalýda.
Qarqyny údeı túsken qurylys alańdaryn aralaǵan aımaq basshysy qurylysshylarmen kezdesti, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Bıyl paıdalanýǵa beriletin kópqabatty úılerdiń qurylys barysyn baqylap, qurylys materıaldarynyń sapasy men jumys kúshiniń jetkiliktiligine basa mán bergen oblys basshysy jaýapty jetekshilerge birqatar tapsyrmalar júktedi.
«Sapa – basty talap. Kópqabatty turǵyn úılerdiń qurylys materıaldary óte sapaly bolýy tıis. Ózderińiz turatyndaı etip salyńyzdar. Jumys kóleminiń kóptigi túsinikti. Desek te, dál qazir kidiretin kez emes», – dedi qurylysshylarmen kezdesken Ómirzaq Estaıuly.
Aımaq basshysy qalanyń ákimshilik-iskerlik ortalyǵynda salynyp jatqan turǵyn úılerdi aralady. Munda 7 qabatty 24 turǵyn úıdiń 22-de qarasha aıynyń sońynda qurylysyn aıaqtaý josparlanǵan. Buǵan qosa, qala turǵyndary men jańadan qonystanýshylardy baspanamen qamtamasyz etý maqsatynda ıpotekalyq turǵyn úılerdiń qataryn arttyrý kózdelip otyr.
Jyl sońyna deıin turǵyn úı kezeginde turǵan jandar úshin 1452 páter berý josparlanǵan. Onyń 1002 páteri ıpotekalyq jolmen berilmek. Al, 450 páter qala boıynsha turǵyn úıge muqtaj tiziminde tirkelgen kópbalaly otbasylarǵa beriletin bolady. Odan ózge, 540 páter kezekte turǵan áleýmettik osal toptardaǵy azamattarǵa, bıýdjettik sala qyzmetkerleri, múmkindigi shekteýli azamattar men kópbalaly az qamtylǵan otbasylar jáne jetim balalarǵa beriledi.
Jalpy, Túrkistan oblysy boıynsha bıyl 240 bıýdjettik ınvestıtsııalyq jobalar iske asyrylýda. Aǵymdaǵy jyly memlekettik jáne ishki ister organdary men bilim berý, densaýlyq saqtaý jáne mádenıet salalaryna tıesili 77 nysannyń qurylysyn aıaqtaý josparlanýda. Qalǵan jobalar 2021 jylǵa ótpeli.
Turǵyn úı qurylysy boıynsha - 83 joba iske asyrylýda, onyń 32-si aǵymdaǵy jyly aıaqtalady. Aımaqta turǵyn úıdi paıdalanýǵa tapsyrý jospary 595,7 myń sharshy metrdi quraıdy. 9 aı ishinde óńirde 406,4 myń sh.m. turǵyn úı paıdalanýǵa berilgen.
2020 jyly «Nurly jer» memlekettik turǵyn úı baǵdarlamasynyń aıasynda memlekettik bıýdjet esebinen 158 nysannyń qurylysyna 36,6 mlrd. teńge bólindi. Jyl qorytyndysy boıynsha 70 nysan paıdalanýǵa tapsyrylady. Nátıjesinde 2430 otbasy baspanamen qamtamasyz etilip, 3604 jeke jer ýchaskelerine ınfraqurylym júıeleri júrgiziletin bolady.
