Túrkistan oblysynda jyl basynan beri 770,2 mlrd teńgeniń ónimi óndirilgen
TÚRKІSTAN. QazAqparat – QR Prezıdenti janyndaǵy Ortalyq kommýnıkatsııalar qyzmetiniń uıymdastyrýymen ótip jatqan brıfıngte Túrkistan oblysynyń ákimi Ómirzaq Shókeev óńirdiń áleýmettik-ekonomıkalyq damý barysyn baıandaýda.
Aımaq basshysy Memleket basshysynyń «Jańa jaǵdaıdaǵy Qazaqstan: is-qımyl kezeńi» atty Joldaýyn iske asyrý aıasyndaǵy atqarylǵan jumystar týraly aıtty, dep habarlaıdy QazAqparat tilshisi.
Oblys ákiminiń sózinshe, óńirde jyl basynan beri óndirilgen ónim kólemi 4,2%-ǵa artyp, 770,2 mlrd teńgeni quraǵan. Jyl qorytyndysymen ósim qarqyny osy deńgeıde saqtalady dep josparlanýda. Ónerkásip óniminiń kólemi 434,5 mlrd teńgeni qurap, búgingi kúni óńirde 142,3 myńǵa jýyq shaǵyn orta bıznes sýbektileri 224,1 mlrd teńgeniń ónimin óndirdi. Investıtsııa kólemi mańyzdy jobalardy iske asyrý boıynsha atqarylǵan jumystardyń nátıjesinde oblysqa 480,9 mlrd teńge ınvestıtsııa tartylyp, kólemi 70,6%-ǵa artqany baıqalady. Qolaıly ınvestıtsııalyq ahýal qalyptastyryp, iskerlik belsendilikti yntalandyrý úshin barlyq sharalar qolǵa alynǵan.
«Aýyl sharýashylyǵynda 635,3 mlrd teńgeniń ónimi óndirilip, ósim 101,8%-dy qurady. Jalpy 831,2 myń tonna ónim eksporttalyp, 90,5 mln AQSh dollaryn qurady. Esepti kezeńge qurylys jumystarynyń kólemi 194,5 mlrd. teńgeni qurap, 78,3%-ǵa ulǵaıdy. Paıdalanýǵa berilgen turǵyn úıdiń jalpy alańy 492,4 myń sharshy metrdi qurap, ótken jyldyń sáıkes kezeńine 107,9% qurady. Aýyz sýmen qamtamasyz etý maqsatynda, 56 nysannyń qurylysyna 18,9 mlrd teńge qarastyrylyp, qamtý deńgeıi 82,7% qurady. 2020 jyly 43 tabıǵı gaz nysanynyń qurylysyn júrgizýge 14,0 mlrd teńge bólinip, jyldyń qorytyndysymen 20 nysannyń qurylys jumystary aıaqtalady. Nátıjesinde, 423 eldi meken nemese 1 mln 275 myń turǵyn tabıǵı gazben qamtylady», - dedi Ómirzaq Shókeev.
