Túrkistan oblysynda jyl basynan beri 706,1 myń tonna ónim eksporttalǵan
TÚRKІSTAN. QazAqparat – Álemde jáne elimizde oryn alǵan karantındik sharalarǵa qaramastan, jyl basynan beri óńirde 706,1 myń tonna ónim eksporttalǵan. Osylaısha sharýalar 90,5 mln AQSh dollarynyń ónimin saýdalaǵan, dep habarlaıdy QazAqparat tilshisi.
Oblys ákimi Ómirzaq Shókeevtiń aıtýynsha, aýyl sharýashylyǵynda jyl basynan beri 522,7 mlrd teńgeniń ónimi óndirilip, ósim 103,5%-dy quraǵan.
«Barlyq sharýashylyqtarda mal basy kóbeıýde. Atap aıtqanda, iri qara mal basy 1,1 mln bastan, qoı men eshki – 4,4 mln bastan asady. Túıe 16,2%-ǵa artyp, 34,1 myń bastan asty. Et óńdeý kásiporyndarynyń júktemesi 158,4 myń tonnany qurady, sút óndirý 600,5 myń tonnadan asty. Respýblıkada iri qara mal etin eksporttaý boıynsha oblys 1 orynda. Ózbekstan, Reseı elderine 5343,8 tn. sıyr eti, Ózbekstan, Iran, Bahreın, Reseı elderine 301,1 tn. qoı eti, Ózbekstan, Reseı elderine 33,8 tn. jylqy eti eksporttaldy», - dep atap ótti Ómirzaq Shókeev.
Sonymen qatar, aımaq basshysy Reseı, Ýkraına, Belorýssııa elderine 133,4 myń tonna baqsha ónimderi eksporttalǵanyn jetkizdi. 1690,8 tonna balyq ónimderi Eýropa (Germanııa, Lıtva) jáne Reseı, Ýkraına, Ózbekstan elderine 13 tonna shujyq ónimderi jáne 1876,9 tonna qus eti Reseıge eksportqa shyǵarylǵan.
