Túrkistan oblysynda jyl basynan beri 7 bala sýǵa ketken
TÚRKІSTAN. QazAqparat - Túrkistan oblysynda jyl basynan beri sý aıdyndarynda 10 adam qaza tapqan, onyń jeteýi - balalar, dep habarlaıdy QazAqparat.
Qaıǵyly jaǵdaıdyń aldyn alý úshin ata-analar balalaryna degen baqylaýdy kúsheıtýi tıis.
Bul týraly tótenshe jaǵdaılar departamentiniń basqarma bastyǵy Qanat Qarabalaev brıfıngte málimdedi.
Onyń aıtýynsha, jalpy óńirde 20 sýǵa shomylý orny naqtylanǵan.
Al atalǵan qaıǵyly oqıǵalar shomylýǵa tyıym salynǵan aımaqtarda bolyp otyr.
Sońǵy 5 jylda oblystaǵy sý aıdyndarynda 252 adam kóz jumǵan.
Ókinishtisi onyń 140-y balalar bolsa, 112-si eresekter.
«Oqys oqıǵany boldyrmas úshin tótenshe jaǵdaılar jáne polıtsııa departamenti, «Nur Otan» partııasy janyndaǵy «Jas Otan» JQ belsendileriniń kómegimen demalys jáne meıram kúnderi turaqty reıd uıymdastyrylýda. Deı turǵanmen shomylýshylar qaýipsizdik sharalaryn esten shyǵarmaǵan jón»,- dedi Qanat Málikaıdaruly.
Oblys boıynsha jalpy uzyndyǵy 15 000 shaqyrymnan asatyn 3 000-ǵa jýyq ózender men kanaldar bar.
Onyń 158-i adamdardyń sýǵa batýy múmkin qaýipti aýmaq sanalady.
