Túrkistan oblysynda jyl basynan beri 32 bıýdjetti jymqyrý deregi tirkelgen

TÚRKІSTAN. QazAqparat – Túrkistan oblysynda sońǵy úsh aıda bıýdjetti jymqyrý deregimen 32 qylmys tirkelgen. Bul týraly búgin QR Sybaılas jemqorlyqqa qarsy is-qımyl agenttiginiń oblystyq departamenti basshysynyń birinshi orynbasary Mıras Qarǵabaı kezekti brıfıngte málimdedi, dep habarlaıdy QazAqparat tilshisi.

Mıras Qarǵabaıdyń aıtýynsha, departament qyzmetkerleriniń jedel izdestirý is-sharalaryn júrgizý nátıjesinde 69 qylmys tirkelgen. Onyń ishinde 46 qylmys sybaılas jemqorlyqqa qatysty anyqtalǵan. Sondaı-aq, ótken jyly bıýdjet qarajatyn jymqyrý deregi boıynsha 11 qylmys tirkelse, aǵymdaǵy jyly bul qylmystardyń sany 32-ge jetken. Memleketke keltirilgen zalaldyń jalpy quny 508,7 mln teńgeni qurap, onyń 502,9 mln teńgesi tolyǵymen óndirilgen.

«Agenttik memlekettik baǵdarlamalarǵa bólingen bıýdjet qarajatyn ysyrap etý men júıeli sybaılas jemqorlyq derekterin anyqtaý, laýazymdy tulǵalar tarapynan shaǵyn jáne orta kásipkerlik bıznesine zańsyz aralasý derekterin anyqtady. Sondaı-aq, oblystyq, qalalyq jáne aýdandyq basshylarǵa qatysty jáne de kóleńkeli ekonomıkaǵa laýazymdy tulǵalar tarapynan qamqorshylyq jasaý derekterin áshkereleý baǵytynda júıeli jumystar atqarylýda»,- dedi Mıras Qarǵabaı.