Túrkistan oblysynda jyl basynan beri 15 memlekettik qyzmetshige ákimshilik is qozǵaldy
TÚRKІSTAN. QazAqparat - Túrkistan oblysynda 94 memlekettik qyzmetshi joǵary laýazymǵa taǵaıyndalǵan.
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysy, Ádep jónindegi Keńes tóraǵasy Ǵalym Tursynbaev brıfıng barysynda málimdedi, dep habarlaıdy QazAqparat tilshisi.
Ǵalym Tursynbaevtyń sózinshe, kadrlardyń taza aýysymdylyǵy boıynsha óńirde 70 qyzmetshi óz erkimen jumystan ketken. Sonymen qatar QR zańnamalaryn bilý deńgeıin anyqtaýǵa arnalǵan testileý rásimine barlyǵy - 491 adam qatysyp, onyń 149-y oń nátıje kórsetken. Al, bos memlekettik ákimshilik laýazymǵa 584 konkýrs jarııalanǵan. Onyń ishinde jalpy konkýrs boıynsha laýazymdarǵa taǵaıyndalǵan 178 úmitkerdiń 71-i memlekettik qyzmet júıesine alǵash ret qabyldanyp, aımaqta mansaptyq ósý kórsetkishi 60,6 % quraǵan.
Aǵymdaǵy jyldyń І-toqsanynda óńirdegi Ádep jónindegi keńeste 2 otyrys ótkizilip, keńes otyrysynda 36 másele qaralǵan. 23 memlekettik qyzmetkerdiń tártiptik isi talqylanyp, 22 qyzmetkerdiń Ádep kodeksin buzǵany anyqtaldy. Keńes sheshimi negizinde 11 laýazymdy tulǵa tártiptik jaýapqa tartylsa, 4 memlekettik qyzmetshi eskertý alǵan. 6 qyzmetker sógis, taǵy bir laýazymdy tulǵaǵa qatań sógis berilgen. Buǵan qosa, jyl basynan beri 15 tulǵaǵa qatysty ákimshilik is qozǵalyp, nátıjesimen 284 053 teńge aıyppul salynǵan.
