Túrkistan oblysynda júrgizýshini óltirip, máıitti órtep jibergen qylmystyq top ustaldy
TÚRKІSTAN. QazAqparat - Túrkistan oblysynda adam óltirip, kólik tonaǵan qylmystyq top ustaldy, dep habarlaıdy QazAqparat Polisia.kz-ke silteme jasap.
Ordabasy aýdandyq PB kezekshi bólimine jergilikti turǵyn aǵasynyń «Mazda-626» avtokóligimen jumystan shyǵyp, áli kúnge deıin úıge qaıtyp kelmegeni týraly aryzdanǵan.
Іz-túzsiz joǵalǵan adamdy izdeý sharalary barysynda joǵalǵan adamnyń avtokóligi Shymkent qalasynyń shetinen tabylǵan. Keıinnen polıtseıler júrgizýshiniń órtengen máıitin Ordabasy aýdany Shubarsý aýylynyń mańynan tapty.
Aýyr qylmysty ashý úshin tájirıbeli qyzmetkerlerinen turatyn jedel-tergeý toby quryldy. Bir aptadan keıin Túrkistan oblysynyń PD krımınaldyq polıtsııa qyzmetkerleri, Ordabasy aýdandyq PB jáne «Búrkit» arnaıy jasaǵymen birge osy qylmysqa qatysy bar degen kúdikpen Jambyl oblysynan kele jatqan «VAZ» avtokóligin ustady.
Olar buryn birneshe ret sottalǵan Túrkistan oblysy men Shymkent qalasynyń turǵyndary bolyp shyqty. Tórteýi de jas jigit.
Tergeý barysynda kúdiktilerdiń ekeýi Shymkent qalasy kósheleriniń birinde jábirlenýshiniń kóligin toqtatyp, bir jerge aparyp tastaýdy suraǵany, dittegen orynǵa kelgennen keıin júrgizýshige shabýyl jasap, tunshyqtyryp óltirip, onyń uıaly telefonyn alyp ketkeni, al máıitti qala syrtyna shyǵaryp órtegeni anyqtaldy.
Qaskúnemder bul qylmysymen toqtap qalmaı, taǵy eki seriktesimen birge Ordabasy aýdanyndaǵy tas jolda «VAZ» avtokóliginiń júrgizýshisine shabýyl jasap, 45 myń teńgelik barsetkasyn tartyp alǵan.
Qazirgi ýaqytta atalǵan faktiler boıynsha Qylmystyq kodekstiń 99-baby (Adam óltirý) jáne 191-baby (Tonaý) boıynsha sotqa deıingi tergeý amaly júrgizilip jatyr.
Kúdiktiler qamaýǵa alyndy. Polıtsııa qyzmetkerleri ustalǵandardyń basqa da osyndaı qylmystarǵa qatysy bar-joǵyn anyqtap jatyr.
