Túrkistan oblysynda jumyssyzdyqqa bólingen qarjylar talan-tarajǵa túsken

TÚRKІSTAN. QazAqparat - Túrkistan oblysynda jumyssyzdyqpen kúresýge bólingen qarjylar talan-tarajǵa túsken. Zańbuzýshylyqtar   Shardara aýdandyq prokýratýra qyzmetkerleriniń halyqty jumyspen qamtý salasyna júrgizgen tekserýler barysynda anyqtaldy, dep habarlaıdy QazAqparat tilshisi.

Oblystyq prokýratýranyń málimetinshe, atalǵan aýdan turǵyndary  jaýapty mamandarmen birlesip,  «Jumyspen qamtý 2020 jol kartasy» men «Nátıjeli jumyspen qamtýdyń jappaı kásipkerlikti damytýdyń 2017-2021 jyldarǵa arnalǵan» baǵdarlamalarǵa bólingen  qarjylardy jymqyrǵan. Atap aıtqanda, aýdannyń 22 turǵyny jergilikti jumys berýshilermen kelisip, Jumyspen qamtý ortalyǵyn aldaǵany dáleldendi. Osylaısha 2016-2017 jyldary aralyǵynda jastar tájirıbesiniń ótip jatqany jáne áleýmettik jumys ornynda eńbek etip jatqany jaıly  jalǵan tabelderdi usynyp, 2 mln teńgege jýyq qarjyny ıemdegen. Al, shyn máninde bul tulǵalar jumyssyzdarǵa arnalǵan áleýmettik qoldaýmen qamtylmaǵan. Sebebi olardyń ózderiniń turaqty jumys oryndary bolǵan.

«Sońǵylardyń áreketterinde qylmys quramy bolǵandyqtan atalǵan derek tirkeldi. Protsessýaldyq sheshim qabyldaý úshin qujattar aýdandyq ІІB-ne joldandy.Sotqa deıingi tergeý barysynda kináli tulǵalar keltirgen zalaldaryn ótedi», delingen habarlamada.