Túrkistan oblysynda jolda qalǵan 23 jolaýshy qutqaryldy
TÚRKІSTAN. QazAqparat - Túrkistan oblysynda jolda qalǵan 23 jolaýshy jylytý beketterine jetkizildi, dep habarlaıdy QazAqparat tilshisi.
Tótenshe jaǵdaılar departamentine «Sozaq - Ekpindi – Ulanbek» baǵytyndaǵy oblystyq mańyzy bar joldarda jolaýshylar men tehnıkalardyń qalyp qoıǵandyǵy týraly aqparat túsken.
Oqıǵa ornyna jetken Túrkistan oblysy TJD-niń 2 tehnıkasy men 10 qyzmetkeri jolda qalyp qoıǵan 53 tehnıkany qar qursaýynan shyǵaryp, 23 adamdy jylytý beketterine jetkizdi.
«Qazirgi tańda Aşysaı - Kentaý, Sozaq – Ulanbek joldary men Muzdybel asýy ýaqytsha jabyq. Barlyq kólikterdiń júrýine shekteý qoıylyp otyr. «Ońtústik joldar» mekemesiniń 10 tehnıkasy men 22 qyzmetkeri joldardy ashý jumystaryn júrgizip jatyr» - dedi oblystyq TJD Tótenshe jaǵdaılardy joıý basqarmasynyń bas mamany I.Eleýsızov. Sondaı-aq, mamandar borandy kúni alys jolǵa shyqpaý kerektigin eskertedi.
