Túrkistan oblysynda jolaýshylar tasymalymen zańsyz aınalysqandar jaýapqa tartyldy
TÚRKІSTAN. QazAqparat - Túrkistan oblysynda zańsyz jolaýshylar tasymalyna tosqaýyl qoıý maqsatynda kezekti reıdtik is-sharalar jalǵasýda. Tólebı aýdanynda ótken kezekti sharaǵa oblystyq Jolaýshylar kóligi jáne avtomobıl joldary basqarmasy men aýdandyq turǵyn úı kommýnaldyq sharýashylyq jáne jolaýshylar kóligi, avtomobıl joldary bólimi qyzmetkerleri qatysty, dep habarlaıdy QazAqparat tilshisi.
Sondaı-aq, reıdke Túrkistan oblysynyń Kóliktik baqylaý ınspektsııasy men Tólebı aýdanynyń polıtsııa bólimi qyzmetkerleri de atsalysty. Birlesken sharalar nátıjesinde turaqty túrde zańsyz jolaýshylar tasymalymen aınalysyp, zańbuzýshylyqqa jol berip júrgen birqatar qoǵamdyq kólikterdiń júrgizýshileri anyqtaldy. Olarǵa qatysty Ákimshilik quqyqbuzýshylyq týraly hattamalar túzilip, aıyppuldar salyndy. Zań aıasynda jaýapqa tartylyp, endi birine eskertýler berildi.
Sonymen qatar, aýdan ákimdiginiń májilis zalynda avtobeket basshylary men avtopark, taksı tasymaldaýshy mekemeler men taksı júrgizýshileri bas qosqan jıyn ótti. Onda Túrkistan oblysynyń Jolaýshylar kóligi jáne avtomobıl joldary basqarmasynyń jolaýshylar kóliginiń mamandary jáne quzyrly mekeme ókilderi jolaýshylar tasymaly boıynsha zań aıasynda túsindirme jumystaryn júrgizdi. Zańbuzýshylyqqa jol berilgen jaǵdaıda qandaı sharalar qoldanylatyny jaıly aıtyldy. Birlesken reıdtik is-sharalar aldaǵy ýaqytta da turaqty túrde júrgiziletin bolyp kelisildi.
