Túrkistan oblysynda jolaýshy tasymaldaýshy jáne júk kóligi soqtyǵysyp, bir adam qaza tapty
TÚRKІSTAN. QazAqparat - Túrkistan oblysynyń Saıram aýdanynda jolaýshy tasymaldaýshy jáne HOWO júk kólikteri soqtyǵysyp, bir adam qaza tapty. Taǵy jeti adam túrli dene jaraqatymen aýrýhanaǵa jetkizilgen, dep habarlaıdy QazAqparat tilshisi.
Jol kólik oqıǵasy keshe túngi saǵat 21:30 shamasynda Batys Eýropa-Batys Qytaı tas jolynyń 4-shaqyrymynda bolǵan.
Oblystyq PD baspasóz qyzmetiniń málimetinshe, oqıǵa ornyna polıtseılerden quralǵan jedel-tergeý toby men prokýratýra qyzmetkerleri shyqqan. Tekserý kezinde anyqtalǵany, TOYOTA ALPARD markaly avtokóliginiń júrgizýshisi Almaty qalasynan Qyzylorda baǵytyna qaraı kele jatyp, aldynda ketip bara jatqan HOWO markaly júk kóliginiń artqy bóligine soqtyǵysqan. Nátıjesinde jol apaty oryn alǵan.
«Jol kólik oqıǵasy kezinde TOYOTA ALPARD kóliginiń jolaýshysy jedel járdem kóliginde ózine kelmeı qaıtys bolǵan. Al 7 jolaýshy túrli dene jaraqattarymen jaqyn mańdaǵy aýrýhanaǵa jetkizilgen. Olardyń birqatary dárigerge kóringen soń úılerine qaıtqan. Qazirgi tańda Saıram APB polıtseılerimen atalǵan jaıt QR QK-niń 345-baby 3-bóligimen «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha tirkeýge alyndy. Avtokólikter aıypturaqqa qoıyldy. Búginde oqıǵanyń tolyq mán-jaıyn anyqtaý sharalary júrgizilýde», - delingen Polıtsııa departamentiniń habarlamasynda.
