Túrkistan oblysynda jolaýshy tasymaldaý qyzmeti jaqsarady

TÚRKІSTAN.QazAqparat – Túrkistan oblysynda ótken jyly 44 tasymaldaýshy kompanııa 1300 qoǵamdyq kólikpen jolaýshylar tasymaldaý qyzmetin kórsetken. Qoǵamdyq kólikterdiń 238-i nemese 18,3%-y jańartylǵan, dep habarlaıdy QazAqparat tilshisi.

Oblys ákimi Ómirzaq Shókeevtiń aıtýynsha, Túrkistan qalasynda 26 jańa avtobýs satyp alynǵan.

«Oblys boıynsha 19 jańa turaqty baǵyt ashylyp, onyń 8-i Túrkistan qalasyn aýdan ortalyqtarymen qosady. Tamyz aıynda Túrkistan qalasynda táýligine 10 myń jolaýshyǵa qyzmet kórsete alatyn halyqaralyq avtovokzal ashyldy. Budan bólek, Túlkibas, Báıdibek jáne Ordabasy aýdandarynyń ortalyqtarynda jolaýshylarǵa qyzmet kórsetý pýnktileri iske qosyldy»,- dedi Ómirzaq Shókeev.

Aımaq basshysy sondaı-aq, «Aýyl - el besigi» jobasy aıasynda jalpy sany 93 jobany iske asyrý úshin 3,9 mlrd teńge bólingenin atap ótti. Nátıjesinde 7 eldi mekende 77 kóshe, 4 mektep, 6 balabaqsha, 1 sport jáne 5 mádenıet nysandary jóndeýden ótkizilgen. Osy baǵytqa 2020 jylǵa jalpy 4,9 mlrd teńge qarjy baǵyttalýda. Al, qurylys jumystarynyń kólemi 182 mlrd teńgeni qurap, ótken jylmen salystyrǵanda 29%-ǵa artqan.

«Elimizde ózekti bolyp otyrǵan az qamtylǵan kópbalaly otbasylarǵa baspana berý máselesine basym nazar aýdarylýda. Osyǵan oraı, 2019 jyly 550,6 myń sharshy metr turǵyn úıdi paıdalanýǵa berý josparlansa, jyldyń qorytyndysymen naqty 620,4 myń sharshy metr iske qosyldy. Sóıtip, tapsyrma 12,7% artyǵymen oryndaldy. Bul óz kezeginde 5 879 otbasyny baspanamen qamtamasyz etýge múmkindik berdi. Túrkistan qalasynyń klımatyn jaqsartý men oblys ortalyǵynda halyqtyń ómir súrýine qolaıly jaǵdaı jasaý maqsatynda oblysta alǵashqy ret 7 700 ga aýmaqqa Jasyl beldeý qurý jumystary qolǵa alynyp, 2300 ga jerge 1 mln astam ár túrli kóshetter egildi. Atalǵan shara aıasynda 2020 jyly 2400 ga aýmaqqa 1 mln astam kóshet otyrǵyzý jumys qarqyndy júrgizilýde. Josparlanǵan meje 2022 jyly tolyq oryndalady»,- dedi Ómirzaq Shókeev.